نۇر-سۇلتاندا جاس جىگىت بەيتانىس ادامدى اياۋسىز سوققىعا جىققان، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
پوليتسيانىڭ “102” ارناسىنا كونستيتۋتسيا كوشەسىندەگى كافەنىڭ جانىندا توبەلەس بولىپ جاتقانى تۋرالى حابارلاما كەلىپ تۇسكەن. تۇنگى ساعات 02:00 شاماسىندا 30 جاستاعى جابىرلەنۋشى كوڭىل كوتەرۋ ورنىنا كەلگەنى انىقتالدى. سودان ول ماس كۇيىندە كافەنىڭ ىشىندە باسقا ەكى كليەنتپەن جانجالداسىپ، كەيىننەن توبەلەسكە ۇلاسقان. كافەنىڭ كىرەبەرىسىندە ماسەلەنى شەشۋ بارىسىندا ولارعا 25 جاستاعى بەلگىسىز جىگىت قوسىلىپ، اگرەسسيۆتى تۇردە ارەكەت ەتىپ، جابىرلەنۋشىنىڭ بەتىنە جۇدىرىعىمەن سوققى بەرگەن.
جابىرلەنۋشى العان سوققىدان اسفالتقا قۇلاپ، ەسىنەن تانىپ قالعان. توبەلەسكە قاتىسۋشىلار وقيعا ورنىنان بوي تاسالاعان.
پوليتسەيلەر كۇدىكتىنى ۇستاپ، “سارىارقا” اۋدانىنىڭ پوليتسيا باسقارماسىنا جەتكىزدى. دەنساۋلىققا قاساقانا اۋىر زيان كەلتىرۋ فاكتىسى بويىنشا ۇستالعان ازاماتقا قاتىستى قر قك-ءنىڭ 106-بابىمەن سوتقا دەيىنگى تەرگەۋ امالدارى جۇرگىزىلۋدە.
بەلگىلى بولعانداي، كۇدىكتىنىڭ بۇنداي توبەلەسكە قاتىسۋى ءبىرىنشى رەت ەمەس. ول 2015 جىلى وسىعان ۇقساس قىلمىس
جاساعانى ءۇشىن سوتتى بولعان.
قازىرگى ۋاقىتتا ۇستالعان ەر ادام پد ۋاقىتشا ۇستاۋ يزولياتورىنا قامالدى. ونىڭ ەلوردا اۋماعىندا بۇرىن جاسالعان قىلمىستارعا قاتىسى بار-جوعى انىقتالۋدا.
بەينەجازبانى كورۋ ءۇشىن سىلتەمەنى باسىڭىز.
