جامبىل وبلىسىنىڭ اكىمى نۇرجان نۇرجىگىتوۆ جۋالى اۋدانىنا جۇمىس ساپارىمەن بارىپ، بىرقاتار نىسانداردىڭ جاي-كۇيىمەن تانىسىپ، قۇرىلىستاردىڭ بارىسىن تەكسەردى.
ەڭ الدىمەن ايماق باسشىسى تەرىس اۋىلىنداعى ەسكى مادەنيەت ءۇيىنىڭ بوس عيماراتىن كوردى. بىرنەشە جىل جەكە مەنشىكتە بولىپ، قاراۋسىز قالعان نىسان بۇگىندە توزىعى جەتىپ، جوندەۋگە جارامسىز كۇيگە تۇسكەن.
بۇعان دەيىن بۇل ماسەلەنى كوتەرگەن تۇرعىنداردىڭ ءوتىنىشىن ەسكەرگەن وبلىس اكىمى ەسكى عيماراتتى بۇزىپ، ورنىنا جاڭا نىسان سالۋ قاجەتتىگىن اتاپ ءوتتى. ول بويىنشا قۇجاتتاما جۇمىستارىن ۋاقىت سوزباي پىسىقتاۋ ءۇشىن اۋدان اكىمدىگىنە ناقتى مىندەتتەر جۇكتەدى.
بۇدان سوڭ ىرگەدەگى دۇكەنگە توسىننان كىرگەن نۇرجان نۇرجىگىتوۆ ازىق-تۇلىك باعالارىن تەكسەردى. دۇكەن يەسىنە ۇستەمە اقىنى تالاپقا ساي
15 پايىزدان اسىرماۋ كەرەكتىگىن ەسكەرتتى.
كەلەسى كەزەكتە وبلىس اكىمى «باقىت» شارۋا قوجالىعىنا ات باسىن بۇردى. شارۋاشىلىق جەتەكشىسى قۋانىشبەك قالدىبەكوۆ «اگرارلىق نەسيە كورپوراتسياسى» اق ارقىلى 38,8 ملن تەنگە نەسيەگە 31 باس «مونبيليارد» اسىل تۇقىمدى ءمۇيىزدى ءىرى قارا مالىن الىپ كەلگەن. چەحيادان جەتكىزىلگەن سيىرلاردىڭ العاشقىسى تولدەپ، كۇندىگىنە 20 ليتردەي ءسۇت بەرۋدە.
شارۋا قوجالىقتىڭ ىرگەسىندەگى سۋارمالى القاپقا ەگىلگەن قۇلپىناي دا ايتارلىقتاي جەمىس بەرۋدە.
بۇل جۇمىستاردى وڭ باعالاعان ايماق باسشىسى «ءبىر اۋىل – ءبىر باعىتتا» جاپپاي ەڭبەك ەتسە، تيىمدىلىك پەن ونىمدىلىكتىڭ ارتاتىنىن قايتالاپ ايتتى.
«اقساي» كانالىنداعى بەتونداۋ جۇمىستارىن مەردىگەر «ەلامان» جشس ورىنداۋدا. قازىرگى تاڭدا 3 شاقىرىمدىق بەتون پليتالارى اۋىستىرىلسا، قالعانى – 2 شاقىرىمدى قۇرايدى. كانال ارقىلى 98 شارۋا قوجالىق سۋمەن قامتىلادى.
نۇرجان نۇرجىگىتوۆ شارۋالارعا قاجەتتى سۋ كولەمىن جەتكىزۋ – باستى مىندەت ەكەنىنە نازار اۋدارتىپ، جۇمىستاردى قىركۇيەك ايىنا دەيىن اياقتاۋدى تاپسىردى.
وبلىس اكىمى قايرات اۋىلىنداعى №2 مىڭبۇلاق ورتا مەكتەبىنىڭ كۇردەلى جوندەۋ شارالارىمەن تانىسىپ، مەردىگەرگە قۇرىلىستى ساپالى ورىنداۋدى ءارى 20 تامىزعا دەيىن تولىعىمەن اياقتاۋ كەرەكتىگىن ەسكەرتتى. ءتيىستى سالالىق باسقارمالار مەن اۋدان باسشىلىعىنا قاتاڭ باقىلاۋدا ۇستاۋدى مىندەتتەدى.
اۋدان ورتالىعى سانالاتىن باۋىرجان مومىشۇلى اۋىلىندا 3 قاباتتى كوپپاتەرلى ءۇي جاڭادان بوي كوتەرگەن. 9 پاتەرلى ءۇيدى ارالاپ كورگەن وبلىس اكىمى اۋماقتىڭ كولەمىن ەسكەرىپ، مۇنداي تاعى ءۇش ءۇي سالۋ مۇمكىندىگىنە كوڭىل ءبولدى. سوعان سايكەس تارتىلىپ جاتقان ينجەنەرلىك جەلىلەردىڭ، جىلۋ قازاندىعىنىڭ الەۋەتىن دە كەڭەيتۋ، قۇجاتتارىن رەتتەۋ بويىنشا جاۋاپتىلارعا ناقتى تاپسىرمالار بەردى. ول اۋدانداعى تۇرعىن ءۇي كەزەگىندە تۇرعان بىرقاتار ازاماتتاردىڭ باسپانا ماسەلەسىن شەشۋگە ىقپال ەتپەك.
سونداي-اق، قوڭىرتوبە اۋىلىنىڭ تۇرعىندارى تازا اۋىز سۋدىڭ يگىلىگىن كورەتىن كۇن الىس ەمەس. ەلدى مەكەنگە تارتىلىپ جاتقان اۋىز سۋ جۇيەسىنىڭ قۇرىلىسى وسى جىلدىڭ اياعىنا دەيىن اياقتالادى دەپ كۇتىلۋدە.
جالپى، اۋدانداعى 49 ەلدى مەكەننىڭ 31-ءى تازا اۋىز سۋمەن قامتىلعان دەسەك، قالعان 18 اۋىلدىڭ تۇرعىندارى 2025 جىلعا دەيىن تىرشىلىك نارىنە تۇگەلدەي قولى جەتەتىن بولادى.
ايماق باسشىسى بورالداي اۋىلدىق وكرۋگىندەگى «التىناي» شارۋا قوجالىعىنا دا باردى. ەگىن جيناۋ ىسىنە قىزۋ كىرىسكەن شارۋا قوجالىق ءار گەكتارىنان ورتاشا ەسەپپەن 18 تسەنتنەردەن ءونىم الۋدا. كۇزدىك بيدايدان تۇسەتىن ءونىم كولەمى دە بۇدان از بولمايدى دەپ كۇتىلۋدە.
ايتا كەتەيىك، بيىل اۋدان بويىنشا 38 مىڭ گەكتارعا ماساقتى ءداندى داقىلدار سەبىلسە، بۇگىندە ونىڭ 15 مىڭ گەكتارعا جۋىعى جينالىپ ۇلگەرگەن. ورتاشا ءونىم – 20,8 تس/گا. ءداندى داقىلداردى ورۋ جۇمىستارىنا جالپى 100-گە جۋىق كومباين جۇمىلدىرىلعان.
نۇرجان نۇرجىگىتوۆتىڭ جۋالى اۋدانىنداعى جۇمىس ساپارى اقتاستى اۋىلىندا تۇيىندەلدى.
شاعىن ەلدى مەكەندەگى مەكتەپتىڭ جاعدايى الاڭداتارلىق كۇيدە. جەكە تۇرعىن ۇيگە ىڭعايلاستىرىلعان وقۋ ورداسىنىڭ عيماراتى توزىعى جەتكەن. وسىعان سايكەس اۋىلداعى جەكە كاسىپكەر سالعان جاڭا عيماراتتى باستاۋىش مەكتەپ رەتىندە پايداعا جاراتۋ مۇمكىندىگى قاراستىرىلۋدا.
وبلىس اكىمى نىساندى ارالاپ كورىپ، قۇجاتتارىن رەتتەۋ، باعالاۋ جۇمىستارىن جۇزەگە اسىرۋ بويىنشا جاۋاپتىلارعا جان-جاقتى زەردەلەۋ جۇرگىزۋ، ءتيىستى شارالار قابىلداۋعا قاتىستى ناقتى تاپسىرمالار جۇكتەدى.
