مەملەكەت باسشىسى قاسىم-جومارت توقاەۆ ەلدىڭ كەمەل كەلەشەگىن كوزدەگەن ءداستۇرلى جولداۋلارىندا ۇكىمەتكە حالىقتىڭ ءال-اۋقاتىن جاقسارتۋعا باعىتتالعان ءىس-شارالار ءتىزىمىن جاساقتاۋدى ءارى ونىڭ جەر-جەرلەردە جۇيەلى جۇزەگە اسىرىلۋىن نازاردا ۇستاۋدى تاپسىرۋدا. پرەزيدەنتتىڭ تاپسىرماسىنا سايكەس، حالىق اتاۋلى كومەك قانا الىپ قويماي، تۇراقتى جۇمىسپەن قامتىلۋى ءتيىس. وڭىرىمىزگە جۇمىس ساپارى بارىسىندا قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايماقتا اتقارىلىپ جاتقان ىلكىمدى ىستەردى كوزبەن كوردى. الدىمەن ءوڭىر اكتيۆىمەن كەزدەسكەن مينيستر حالىقتى جۇمىسپەن قامتۋ شارالارىنا توقتالىپ، جەرگىلىكتى اتقارۋشى ورگان وكىلدەرىن جۇمىسسىزدىق دەڭگەيىن نازاردا ۇستاۋعا شاقىردى.
ءوڭىر باسشىسى نۇرجان نۇرجىگىتوۆ، وبلىستىق ءماسليحات پەن جەرگىلىكتى اتقارۋشى ورگان وكىلدەرى، اۋدان اكىمدەرى قاتىستى. جيىندا تامارا دۇيسەنوۆا قازىر ەڭبەك نارىعىندا بولىپ جاتقان وزگەرىستەر تۋرالى ايتتى. ايماقتا 15-28 جاس ارالىعىنداعى جاستاردىڭ سانى – 221 مىڭ. بۇل وبلىس حالقىنىڭ 19 پايىزىن قۇرايدى. وسىعان وراي، مينيستر جاستاردى جۇمىسپەن قامتۋدىڭ ماڭىزدىلىعىنا ايرىقشا توقتالدى.
- جامبىل وبلىسىنداعى جاستاردىڭ سانى 2030 جىلعا قاراي 64 مىڭ ادامعا كوبەيىپ، 286 مىڭعا جەتەدى. ال 2040 جىلعا قاراي بۇل كورسەتكىش تاعى 100 مىڭعا ارتادى. ەكونوميكالىق بەلسەندى جاستاردىڭ سانى 2030 جىلعا قاراي 149 مىڭعا دەيىن كوبەيىپ، ەڭبەك نارىعىنا كۇش تۇسىرەتىنى انىق. مەكتەپتەگى بىلىممەن قالعان جاستاردىڭ ۇلەسى - 18%، ال جوعارى ءبىلىمدى جاستاردىڭ ۇلەسى - 39%»، - دەدى تامارا دۇيسەنوۆا.
بۇدان بولەك، مينيستر بيىلعى جىلدىڭ 6 ايىندا وبلىستا 27 مىڭنان استام ادامنىڭ جۇمىسقا ورنالاسقانىن اتاپ ءوتتى. ونىڭ باسىم كوپشىلىگى – 17 مىڭنان استام ازامات جۇمىسپەن قامتۋ ورتالىقتارى ارقىلى جۇمىسقا تۇرعان.
- جامبىل وبلىسىندا جۇمىسسىز رەتىندە تىركەلگەن 4816 جۇمىسسىز ادامنىڭ 2526-ءنىڭ بىلىكتىلىگى بار، ال 2290 ادامنىڭ بىلىكتىلىگى جوق. وڭىردە بوس جۇمىس ورىندارى جەتكىلىكتى ەكەنىن ەلەكتروندى ەڭبەك بيرجاسىنداعى وسىنداي مىسالداردان-اق بايقاۋعا. جۇمىسسىز ازاماتتارعا قولداۋ كورسەتىپ، قاجەتتى جۇمىس ورىندارىنا ورنالاسۋعا بارىنشا قولداۋ كورسەتۋ بارلىعىمىزدىڭ مىندەتىمىز»، – دەدى ت.دۇيسەنوۆا.
كەزدەسۋدە سونداي-اق قازاقستاندىقتاردى زەينەتاقىمەن قامتۋ، حالىقتى الەۋمەتتىك قولداۋ مۇگەدەكتىگى بار ادامداردى قولداۋ شارالارى دا تالقىعا ءتۇستى.
بۇدان كەيىن، ەحاقم باسشىسى ايماق تۇرعىندارىنىڭ تۇرمىستىق تابىسىن جاقسارتۋ پيلوتتىق جوباسىنىڭ جۇزەگە اسۋ بارىسىمەن تانىستى. جالپى، اتالعان جوبا بيىلعى جىلى تاعى 10 اۋىلدىق وكرۋگتە ىسكە اسپاق. بۇل باعىتقا «اگرارلىق نەسيە كورپوراتسياسى» اكتسيونەرلىك قوعامى ارقىلى نەسيەلەندىرۋگە بولىنگەن 6 ملرد. 47,5 ملن. تەڭگە قارجى قاراستىرىلۋدا. قازىرگى تاڭدا جوبانىڭ بەس باعىتى بويىنشا اۋىلدىق وكرۋگتەردىڭ ەسەپتەرى ناقتىلانۋدا. تامارا قاسىمقىزى اۋىلدىق جەرلەردەگى جانۇيالاردىڭ تابىس كوزىنە اينالعان جوبانىڭ جۇيەلى ىسكە اسۋىنا ەرەكشە كوڭىل ءبولۋ قاجەتتىگىن جەتكىزدى.
بۇگىندە بىرەگەي جوبانىڭ جەمىسىن بايزاق اۋدانىنداعى قوستوبە جانە ۇلگىلى اۋىلدىق وكرۋگىندەگى تۇرعىندارى دا كورۋدە. قازىرگى تاڭدا ولار ءوز جەكە كاسىپتەرىن اشىپ، يگىلىگىن كورىپ وتىر. تۇرمىسى تۇزەلگەن تۇرعىندار مينيسترمەن ءوز جوسپارلارىمەن ءبولىستى. قوستوبە اۋىلدىق وكرۋگىنە قاراستى تالاس اۋىلىنىڭ تۇرعىنى ابۋجاقىپ قالداروۆ جوبانىڭ ءتيىمدى تۇستارىن اتاپ ءوتتى. زەينەتكەر 2 ميلليون 400 مىڭ تەڭگە كولەمىندە قارجىلىق قولداۋعا يە بولىپ، مال شارۋاشىلىعىن دامىتۋدى قولعا العان. قازىرگى تاڭدا مال باسى 15 جىلقىعا جەتكىزگەن اۋىل تۇرعىنى بۇل كاسىپ وتباسىنىڭ تابىس كوزىنە اينالعانىن ايتتى.
- پيلوتتىق جوبا اياسىندا وتباسىلىق جەكە كاسىبىمىزدى اشتىق. العاشىندا 5 جىلقى ساتىپ الدىق .بۇگىندە ءوز جوسپارلارىمىزدى سەنىمدى تۇردە جۇزەگە اسىرۋدامىز. اۋىل ەكونوميكاسىنىڭ دامۋىنا ۇلەس قوسىپ، باعدارلامانىڭ قارقىندى جۇزەگە اسۋىنا ۇلەسىمىزدى قوساتىن بولامىز. سەبەبى، ونىڭ پايداسى مول ەكەنىنە كوزىمىز جەتتى، - دەيدى شارۋا.
اۋىلدىق وكرۋگتەگى ساپارىندا مينيستر جوبانىڭ يگىلىگىن كورگەن بىرنەشە تۇرعىندارمەن كەزدەستى. ولاردىڭ قاتارىندا ءىرى قارا مال وسىرۋمەن قاتار، ۇلەسىندە 10 سوتتىق جەرى بار قوستوبە اۋىلىنداعى «رۇستەم»، اسىل تۇقىمدى تاۋىقتاردى ءوسىرۋدى كاسىپكە اينالدىرعان ۇلگىلى اۋىلىنداعى «عالىمجان» جەكە شارۋاقوجالىقتارى بار. اسىرەسە، تەمىردەن ءتۇيىن تۇيگەن امىربەك تولەپوۆتىڭ جۇمىسى جۇرتتى ءسۇيسىنتتى. جوبا اياسىندا 2 ميلليون 800 مىڭ تەڭگە كولەمىندە نەسيەگە قول جەتكىزگەن ول بۇگىندە 6 ادامدى جۇمىسپەن قامتىپ وتىر. مەكتەپ قابىرعاسىندا-اق ءتۇرلى تەحنيكانىڭ ءتىلىن مەڭگەرگەن امىربەك بۇل كۇندە اسىراۋشى سالاعا قاجەتتى تەحنيكا جاساۋدىڭ مايتالمان مامانى اتانعان.
- بۇل ىسكە بالا كۇنىمنەن قۇمار بولدىم. سوندىقتان، ءاربىر تەحنيكاعا بارىنشا جانىمدى، كۇش-قايراتىمدى، يدەيامدى قوسامىن. مەيلىنشە، شارۋاشىلىققا اسا قاجەتتى ەرەكشە تۋىندى جاساۋعا تىرىسامىن. الداعى ۋاقىتتا كاسىبىمدى ۇلعايتۋدى جوسپارلاپ وتىرمىن، - دەدى ءا.تولەپوۆ.
شارۋالاردىڭ تىنىس-تىرشىلىگىمەن تانىسقان سوڭ مينيستر حانىم جوبا اياسىندا نەسيە راسىمدەپ، جۇمىسىن دوڭگەلەتىپ وتىرعان كاسىپكەرلەردىڭ قۇلاشىن كەڭگە سەرمەۋىنە جەرگىلىكتى بيلىك تاراپىنان بارىنشا قولداۋ كورسەتىلۋى قاجەتتىگىن اتاپ ءوتتى.
جۇمىس ساپارى سوڭىندا قر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا وبلىس ورتالىعىنداعى 150 ورىندىق وڭالتۋ ورتالىعىنىڭ قۇرىلىسىمەن تانىستى. ايتا كەتەيىك، عيمارات بىرنەشە بلوكتان تۇرادى. ماسەلەن، ءبىرىنشى بلوكتا باسسەين، كيىم اۋىستىراتىن بولمە، سپورت جانە كورەرمەندەر زالى بولسا، ەكىنشى بلوكتا – مەديتسينالىق كابينەتتەر ورنالاسقان. ال ءۇشىنشى بلوكتا - اسحانا، قالعان بلوكتاردا-ەكى ورىندىق جانە ءبىر ورىندىق پالاتالار بار. قۇرىلىسقا جاۋاپتى "تارازستروي-2004" مەردىگەر كومپانياسى جۇمىستاردى كەلەسى جىلى اياقتاۋدى جوسپارلاپ وتىر.
