ايماق باسشىسى نۇرجان نۇرجىگىتوۆتىڭ توراعالىعىمەن وتكەن كەڭەستە وڭىردە جايىلىمدىق جەرلەردىڭ تاپشىلىعىن تومەندەتۋ، اۋىل حالقىنىڭ تابىسىن ارتتىرۋ بويىنشا پيلوتتىق جوبانى ىسكە اسىرۋ، مال شارۋاشىلىعىن دامىتۋ ماسەلەلەرى قارالدى. جيىنعا بەينەكونفەرەنتسيا بايلانىسى رەجيمىندە اۋدان اكىمدەرى دە قاتىستى.
كەڭەس بارىسىندا نۇرجان مولديارۇلى مەملەكەت باسشىسىنىڭ تاپسىرماسىن ورىنداۋ ماقساتىندا اۋىل شارۋاشىلىعى ماقساتىنداعى جەرلەردى پايدالانۋدىڭ تيىمدىلىگىنە كەزەڭ-كەزەڭمەن تالداۋ جۇرگىزۋ، سونداي-اق ءاربىر اۋىلدىق وكرۋگ بويىنشا اۋىل شارۋاشىلىعى جەرلەرىنىڭ كارتاسىن ازىرلەۋ بويىنشا مىندەتتەر قويدى. اۋدان اكىمدەرىنە جايىلىم تاپشىلىعى ماسەلەسىن شەشۋ ءۇشىن بەس نەگىزگى باعىت بويىنشا شارالار قابىلداۋ جۇكتەلدى.
جيىندا الدىمەن وبلىس اكىمدىگى جەر قاتىناستارى باسقارماسىنىڭ باسشىسى باقتيار كوپبوسىنوۆ اعىمداعى جاعداي مەن بيىلعى جىلعا ارنالعان جوسپارلار تۋرالى باياندادى.
- ءبىرىنشى باعىت-ەلدى مەكەندەردەن تىس ورنالاسقان مال جايۋ جەرلەرىن اۋىلدىق وكرۋگتەرگە بەكىتۋ قاجەتتىگى. جىل سوڭىنا دەيىن اۋىلدىق وكرۋگتەرگە 106,9 مىڭ گەكتار جەر بەرۋ جوسپارلانىپ وتىر. بۇگىنگى تاڭدا تەك جامبىل اۋدانىندا 706 گەكتار جەر بەرىلدى.
ەكىنشى باعىت - اۋىلداردان بەس شاقىرىم راديۋستا ورنالاسقان جايىلىمدىق جەرلەردى مەملەكەتتىك مەنشىگىنە قايتارۋ. جوسپار بويىنشا – 165,6 مىڭ گەكتار بولسا، 6 ايدىڭ قورىتىندىسىمەن - 5,0 مىڭ گەكتار قايتارىلدى.
ءۇشىنشى باعىت - ورمان قورى جەرلەرىندە ورنالاسقان جايىلىمداردى پايدالانۋ. ازىرگە تەك 132 ادام 112,1 مىڭ گەكتار جەردى يەلەندى.
ءتورتىنشى باعىت - جەر پايدالانۋشىلارمەن مەموراندۋمعا قول قويۋ. سوعان سايكەس، ولار مال جايۋعا كەدەرگى جاساماۋعا مىندەتتەلەدى. بۇگىنگى تاڭدا 2071 تۇرعىنمەن 487 مىڭ گەكتار جەردى پايدالانۋ تۋرالى كەلىسىمگە قول جەتكىزىلدى.
بەسىنشى باعىت - پايدالانىلمايتىن اۋىل شارۋاشىلىعى جەرلەرىن اينالىمعا قايتارۋ. جالپى، 145,9 مىڭ گەكتار جەردى مەملەكەتتىك مەنشىككە قايتارۋ جوسپارلانۋدا، 6 اي ىشىندە 52,6 مىڭ گەكتار قايتارىلدى، - دەدى ب.كوپبوسىنوۆ.
الايدا، اۋدانداردىڭ بارلىعى دەرلىك بەكىتىلگەن جوسپاردى ورىنداۋدا سەلقوستىق تانىتقان.
ايماق باسشىسى اۋدان اكىمدەرىنە قاتاڭ تالاپ قويىپ، بۇرىن بەرىلگەن تاپسىرمالاردى ورىنداماعانى ءۇشىن جەر قاتىناستارى باسقارماسىنىڭ، اۋدان اكىمدىكتەرىنىڭ جۇمىسىن سىنعا الدى.
- اۋدان اكىمدەرى اۋىل حالقىنىڭ تابىسىن ارتتىرۋ بويىنشا پيلوتتىق جوبانىڭ كولەمىن ۇلعايتۋدى سۇرايدى. ارينە، جوبانى ىسكە اسىرۋ ناتيجەسىندە مال باسى وسەتىنى بارشاعا تۇسىنىكتى. ەگەر سىزدەر جايىلىم ماسەلەسىن شەشپەسەڭىزدەر، بۇل مالدى قايدا جايۋعا نيەتتىسىزدەر؟ ناقتى جوسپار بار، ادىستەمە ءتۇسىندىرىلدى، كۇن سايىن وسى ماسەلەلەرگە ۋاقىت ءبولۋ قاجەت. ءبىز مۇنى تالقىلاپ جاتقانىمىزعا ءبىر جىل بولدى. بۇل ىسكە بىلەك سىبانا كىرىسەتىن كەز كەلدى. ءبىز ونسىزدا بۇعان كوپ ۋاقىتىمىزدى جوعالتتىق، - دەگەن نۇرجان نۇرجىگىتوۆ ءادىسنامانى وزگەرتپەي، بەس باعىت بويىنشا جۇمىستى ساپالى جانە ۋاقتىلى جۇرگىزۋدى تالاپ ەتتى.
ءوڭىر باسشىسى جىل سوڭىنا دەيىن بەكىتىلگەن جوسپار ەشقانداي سەبەپسىز تولىعىمەن ورىندالۋى كەرەك ەكەنىن ەسكە سالىپ، جەر قاتىناستارى باسقارماسى مەن جەر ينسپەكتسياسى تاپسىرمالاردىڭ ورىندالۋىن قاتاڭ باقىلاۋعا الۋى ءتيىس ەكەندىگىن قاداپ ايتتى.
باسقوسۋ بارىسىندا سونداي-اق اۋىل شارۋاشىلىعى، ۆەتەريناريا باسقارمالارىنا، اۋدان اكىمدىكتەرىنە مال شارۋاشىلىعىن دامىتۋ ماسەلەسى بويىنشا سىن-ەسكەرتپەلەر دە ايتىلدى. قازىرگى تاڭدا مەملەكەت تاراپىنان ىقم انالىق باسىن قولدان ۇرىقتاندىرۋ بويىنشا كورسەتىلەتىن قىزمەتتەر سۋبسيديالانادى. دەسە دە، بۇل باعىتتا جەرگىلىكتى دەڭگەيدە جۇيەلى جۇمىس جولعا قويىلماعان.
- جاۋاپتى تۇلعالار اۋىل تۇرعىندارىنا وسى سۋبسيديالاردى الۋعا نەلىكتەن كومەكتەسپەيدى؟ مالدى جاساندى ۇرىقتاندىرۋ فەرمالاردىڭ ونىمدىلىگىن ارتتىرۋعا كومەكتەسەدى. سونىمەن قاتار، ۆەتەريناريالىق-سانيتاريالىق ءال-اۋقاتقا اسەر ەتەدى. پيلوتتىق جوبا ىسكە اسىرىلىپ جاتقان بارلىق وكرۋگتەردە بۇل جۇمىستى تولىق كولەمدە جۇرگىزۋ قاجەت. سۋبسيديالاردى اۋىل شارۋاشىلىعى كووپەراتيۆتەرى الاتىنى بەلگىلى. ەگەر اكىمدەر باستاما كوتەرىپ، باسقا اۋىلدىق وكرۋگتەردە كووپەراتيۆتەر قۇرسا، ءبىز ونى قولدايمىز. ءبىز قوعامنىڭ يگىلىگى ءۇشىن قىزمەت ەتەمىز. حالىقتىڭ تابىسىن ارتتىرۋ تۋرالى كەز كەلگەن مۇمكىندىكتى پايدالانۋ ماڭىزدى. مەملەكەتتىڭ كومەگى اۋىلداعى ءاربىر وتباسىعا جەتۋى ءتيىس، - دەدى نۇرجان نۇرجىگىتوۆ.
ايماق باسشىسى كەڭەس قورىتىندىسىندا وبلىس اكىمدىگى جەر قاتىناستارى، اۋىل شارۋاشىلىعى باسقارمالارىنىڭ باسشىلارىنا ەسكەرتۋ جاسادى. ايتا كەتەيىك، ءدال وسى ماسەلەلەر ءبىر جەتىدەن سوڭ قايتا قارالماق.
