الەۋمەتتىك جەلىدە تارالعان ۆيدەودا اسكەريلەر ءۇش ساربازدى ورتاعا الىپ، بىرەۋى جاڭا تۇسكەن كەلىندەي كوپشىلىككە سالەم سالىپ جاتىر، دەپ حابارلايدى "ادىرنا" ۇلتتىق پورتالى ەكسپرەسس ك سايتىنا سىلتەمە جاساپ.
بەينەجازبانىڭ ناقتى قاشان جانە قاي جەردە تۇسىرىلگەنى بەلگىسىز. ۆيدەودا ءبىر توپ سارباز عيماراتتىڭ ىشىندە "بەتاشار" ءراسىمىن وتكىزۋدە. جاس كەلىن مەن ونى قولتىقتاپ تۇرعان ەكى جەڭگەسىنىڭ رولىندە ساربازدار تۇر. كادر سىرتىنداعى اسابا دومبىرامەن اندەتىپ، "كەلىنگە" جاڭا تۋىستارىن تانىستىرۋدا. باسقا ساربازدار ورتاعا قويىلعان اسكەري باس كيىمگە اقشا تاستاپ، ءماز بوپ جاتىر. ساربازداردىڭ كوڭىلى كوتەرىڭكى ەكەنى بايقالادى.
ساربازداردىڭ بۇل ارەكەتى كوپشىلىكتىڭ اشۋ-ىزاسىنا ءتيدى. "قازىرگى ءبىزدىڭ اسكەردىڭ سيقى وسى", " ۇياتسىزدار", "ەل قورعاي ما دەسەك، مىنالاردىڭ ىستەپ جۇرگەنى مىناۋ" دەگەن سىڭايداعى پىكىرلەر كوپتەپ كەزدەسەدى.
كەيبىر قولدانۋشىلار بۇل اسكەردەگى الىمجەتتىكتىڭ سالدارى دا بولۋى مۇمكىن دەپ توپشىلاپتى. "قاي بالا كەلىنشەك بولعىسى كەلەدى. وسىلاي جالعاسا بەرەدى، ولمەگەندە نە ىستەيدى؟" دەيدى جۇرتشىلىق. سونداي-اق ۆيدەوداعى كورىنىستى ءجاي ءازىل، كوڭىل كوتەرۋ ءۇشىن جاسالعان دۇنيە ەكەنىن ايتقاندار دا بار.
"ادىرنا" ۇلتتىق پورتالى
