مەملەكەت باسشىسىنىڭ «اكىمدەردىڭ حالىقپەن كەزدەسۋلەرىن وتكىزۋ تۋرالى» جارلىعىنا سايكەس جامبىل وبلىسىنىڭ اكىمى نۇرجان نۇرجىگىتوۆ قورداي اۋدانىنىڭ تۇرعىندارىمەن كەزدەسىپ، ازاماتتاردى جەكە ماسەلەلەلەرى بويىنشا قابىلداۋلار وتكىزدى.
باسقوسۋعا وبلىستىق قۇقىق قورعاۋ ورگاندارىنىڭ باسشىلىق وكىلدەرى دە قاتىستى.
ايماق باسشىسى الدىمەن ماسانشى اۋىلدىق مادەنيەت ۇيىندە جەرگىلىكتى تۇرعىندارمەن كەزدەستى. كەزدەسۋدە اۋىلدىقتار كوكەيدە جۇرگەن وزەكتى ساۋالدارىن جولداپ، جاۋاپتار الدى.
وبلىس اكىمى اۋىلدا سوڭعى جىلدارى ايتارلىقتاي وڭ وزگەرىستەر ورىن الىپ، كوپتەگەن جۇمىستار اتقارىلعانىن ايتىپ، باسقا دا ماسەلەلەر كەزەڭ-كەزەڭىمەن شەشىلەتىنىڭ جەتكىزدى.
ءدال وسىنداي كەزدەسۋ قورداي اۋىلىندا دا ءوتتى.
- مەملەكەت باسشىسىنىڭ جارلىعىنا سايكەس وزدەرىڭىزبەن كەزدەسىپ وتىرمىز. بۇعان دەيىن وبلىستاعى ءتۇرلى دەڭگەيدەگى اكىمدەر تۇرعىندارمەن 375 كەزدەسۋ وتكىزدى. جەرگىلىكتى حالىقپەن كەزدەسىپ، وي-ۇسىنىستارى مەن ماسەلەلەرىن تىڭداۋ، ولاردى زاڭ اياسىندا شەشۋ ءۇشىن شارالار قابىلداۋ بويىنشا جۇمىستار جالعاساتىن بولادى. ءبىز سىزدەردى تىڭداۋعا قاشان دا دايىنبىز،- دەدى نۇرجان نۇرجىگىتوۆ ءوز سوزىندە.
سۇراق-جاۋاپ كەزەگىندە تۇرعىندار كوگىلدىر وتىندى ۇيگە تارتۋ قۇنىنىڭ قىمباتتىعىن، اۋىز سۋ، تىڭايتقىش تاپشىلىعى، مۋزىكا مەكتەبىن سالۋ، جاڭا مۋزەي عيماراتىنىڭ قۇرىلىسىن جۇرگىزۋ جانە تاعى دا باسقا ماسەلەلەرگە نازار اۋدارتتى.
ايماق باسشىسى كەزدەسۋلەردە كوتەرىلگەن ماسەلەلەردىڭ بارلىعى نازارعا الىناتىنىن اتاپ ءوتتى.
باسقوسۋدان سوڭ وبلىس اكىمى اۋىلدىقتاردى جەكە ماسەلەلەرى بويىنشا قابىلداۋلار وتكىزدى.
- ءبىز ەلىمىزدىڭ وركەندەۋىن قالاساق زاڭدىلىق پەن ءتارتىپتى ساقتاۋعا ءتيىسپىز. حالىق پەن بيلىك ءوزارا ءتۇسىنىسىپ، ەكى جاقتى جاۋاپكەرشىلىكتى سەزىنگەندە عانا ماسەلەردى شەشۋدە ناتيجەگە قول جەتكىزە الامىز،-دەدى نۇرجان نۇرجىگىتوۆ.
