تۇركىستان وبلىسىندا بيىل 97 كوپقاباتتى تۇرعىن ءۇيدىڭ قۇرىلىسى اياقتالىپ، 6 مىڭ وتباسى قونىس تويىن تويلايدى. ياعني، بارلىق قارجىلاندىرۋ كوزدەرىنەن 855 مىڭ شارشى مەتر تۇرعىن ءۇي (5935) پاتەر پايدالانۋعا بەرىلەدى. بۇل شامامەن 100-دەن استام فۋتبول الاڭىنىڭ كولەمىنە تەڭ. «نۇرلى جەر» مەملەكەتتىك تۇرعىن ءۇي قۇرىلىسى باعدارلاماسى اياسىندا قۇرىلىسى ءجۇرىپ جاتقان 5, 7,9 جانە 12 قاباتتى ۇيلەردىڭ ساپاسى قاتاڭ باقىلاۋدا. جىل باسىنان بەرى ەلىمىزدە 7,7 ملن شارشى مەتر تۇرعىن ءۇي تاپسىرىلعان. ەڭ جوعارى كورسەتكىش تۇركىستان وبلىسىنا تيەسىلى. بۇل تۋرالى بۇگىن وتكەن ۇكىمەت وتىرىسىندا ايتىلدى، دەپ حابارلايدى “ادىرنا” ۇلتتىق پورتالى.
جىل باسىنان بەرى جالپى الاڭى 365,8 مىڭ شارشى مەتر باسپانا پايدالانۋعا بەرىلدى. مەجەلەنگەن جوسپار 61,6 مىڭ شارشى مەترگە ارتىق ورىندالعان. جانە جوسپار وتكەن جىلدىڭ وسى مەرزىمىمەن سالىستىرعاندا 122,2 % -عا ورىندالعان.
جالپى تۇركىستان وبلىسىنداعى قۇرىلىس جۇمىستارىنىڭ كولەمى 7 ايدا 150 ملرد. تەڭگەگە جۋىقتادى.
تۇركىستان وبلىسىنىڭ اكىمى ومىرزاق شوكەەۆ اكىمشىلىك-ىسكەرلىك ورتالىعىنداعى جاڭا قالادا بوي كوتەرگەن بىرقاتار كوپقاباتتى تۇرعىن ۇيلەردىڭ قۇرىلىس بارىسىن قاداعالاپ، مەردىگەرلەرمەن كەزدەستى.
مۇنداعى پاتەرلەر نەسيەلىك نەگىزدە، كەزەكتە تۇرعان وتباسىلارعا بەرىلەدى. سالىنىپ جاتقان ۇيلەردىڭ قۇرىلىسىمەن تانىسقان وبلىس اكىمى مەردىگەر مەكەمەلەرگە ساپاعا باسا نازار اۋدارۋدى تاپسىردى. تۇرعىن ۇيلەردىڭ ينفراقۇرىلىمى، ەلەكتر، جىلۋ جۇيەسى تالاپقا ساي بولۋى كەرەكتىگىن ايتقان ءوڭىر باسشىسى قۇرىلىس ساپاسىنىڭ قاتاڭ ساقتالۋىن ەسكەرتتى.
”قالانعان ءاربىر كىرپىش ءۇشىن جاۋاپى ەكەندەرىڭىزدى ەستەن شىعارماڭىزدار. ۇيلەر تالاپقا ساي، ساپالى سالىنىپ، كەستەگە سايكەس تاپسىرىلۋى ءتيىس. سىن، ەسكەرتپەلەردى نازارعا الىپ، ۇيلەردىڭ اينالاسىن اباتتاندىرۋعا باسا نازار اۋدارۋ قاجەت. گازونمەن قاتار، اعاشتار ەگىلۋى جانە ۋاقىتىمەن باپتالۋى ءتيىس”، – دەدى ومىرزاق شوكەەۆ.
“ادىرنا” ۇلتتىق پورتالى
