Túrkistan oblysynda bıyl 97 kópqabatty turǵyn úıdiń qurylysy aıaqtalyp, 6 myń otbasy qonys toıyn toılaıdy. Iaǵnı, barlyq qarjylandyrý kózderinen 855 myń sharshy metr turǵyn úı (5935) páter paıdalanýǵa beriledi. Bul shamamen 100-den astam fýtbol alańynyń kólemine teń. «Nurly jer» memlekettik turǵyn úı qurylysy baǵdarlamasy aıasynda qurylysy júrip jatqan 5, 7,9 jáne 12 qabatty úılerdiń sapasy qatań baqylaýda. Jyl basynan beri elimizde 7,7 mln sharshy metr turǵyn úı tapsyrylǵan. Eń joǵary kórsetkish Túrkistan oblysyna tıesili. Bul týraly búgin ótken Úkimet otyrysynda aıtyldy, dep habarlaıdy “Adyrna” ulttyq portaly.
Jyl basynan beri jalpy alańy 365,8 myń sharshy metr baspana paıdalanýǵa berildi. Mejelengen jospar 61,6 myń sharshy metrge artyq oryndalǵan. Jáne jospar ótken jyldyń osy merzimimen salystyrǵanda 122,2 % -ǵa oryndalǵan.
Jalpy Túrkistan oblysyndaǵy qurylys jumystarynyń kólemi 7 aıda 150 mlrd. teńgege jýyqtady.
Túrkistan oblysynyń ákimi Ómirzaq Shókeev ákimshilik-iskerlik ortalyǵyndaǵy jańa qalada boı kótergen birqatar kópqabatty turǵyn úılerdiń qurylys barysyn qadaǵalap, merdigerlermen kezdesti.
Mundaǵy páterler nesıelik negizde, kezekte turǵan otbasylarǵa beriledi. Salynyp jatqan úılerdiń qurylysymen tanysqan oblys ákimi merdiger mekemelerge sapaǵa basa nazar aýdarýdy tapsyrdy. Turǵyn úılerdiń ınfraqurylymy, elektr, jylý júıesi talapqa saı bolýy kerektigin aıtqan óńir basshysy qurylys sapasynyń qatań saqtalýyn eskertti.
”Qalanǵan árbir kirpish úshin jaýapy ekenderińizdi esten shyǵarmańyzdar. Úıler talapqa saı, sapaly salynyp, kestege sáıkes tapsyrylýy tıis. Syn, eskertpelerdi nazarǵa alyp, úılerdiń aınalasyn abattandyrýǵa basa nazar aýdarý qajet. Gazonmen qatar, aǵashtar egilýi jáne ýaqytymen baptalýy tıis”, – dedi Ómirzaq Shókeev.
“Adyrna” ulttyq portaly
