Türkıstan oblysynda biyl 97 köpqabatty tūrǧyn üidıŋ qūrylysy aiaqtalyp, 6 myŋ otbasy qonys toiyn toilaidy. Iаǧni, barlyq qarjylandyru közderınen 855 myŋ şarşy metr tūrǧyn üi (5935) päter paidalanuǧa berıledı. Būl şamamen 100-den astam futbol alaŋynyŋ kölemıne teŋ. «Nūrly jer» memlekettık tūrǧyn üi qūrylysy baǧdarlamasy aiasynda qūrylysy jürıp jatqan 5, 7,9 jäne 12 qabatty üilerdıŋ sapasy qataŋ baqylauda. Jyl basynan berı elımızde 7,7 mln şarşy metr tūrǧyn üi tapsyrylǧan. Eŋ joǧary körsetkış Türkıstan oblysyna tiesılı. Būl turaly bügın ötken Ükımet otyrysynda aityldy, dep habarlaidy “Adyrna” ūlttyq portaly.
Jyl basynan berı jalpy alaŋy 365,8 myŋ şarşy metr baspana paidalanuǧa berıldı. Mejelengen jospar 61,6 myŋ şarşy metrge artyq oryndalǧan. Jäne jospar ötken jyldyŋ osy merzımımen salystyrǧanda 122,2 % -ǧa oryndalǧan.
Jalpy Türkıstan oblysyndaǧy qūrylys jūmystarynyŋ kölemı 7 aida 150 mlrd. teŋgege juyqtady.
Türkıstan oblysynyŋ äkımı Ömırzaq Şökeev äkımşılık-ıskerlık ortalyǧyndaǧy jaŋa qalada boi kötergen bırqatar köpqabatty tūrǧyn üilerdıŋ qūrylys barysyn qadaǧalap, merdıgerlermen kezdestı.
Mūndaǧy päterler nesielık negızde, kezekte tūrǧan otbasylarǧa berıledı. Salynyp jatqan üilerdıŋ qūrylysymen tanysqan oblys äkımı merdıger mekemelerge sapaǧa basa nazar audarudy tapsyrdy. Tūrǧyn üilerdıŋ infraqūrylymy, elektr, jylu jüiesı talapqa sai boluy kerektıgın aitqan öŋır basşysy qūrylys sapasynyŋ qataŋ saqtaluyn eskerttı.
”Qalanǧan ärbır kırpış üşın jauapy ekenderıŋızdı esten şyǧarmaŋyzdar. Üiler talapqa sai, sapaly salynyp, kestege säikes tapsyryluy tiıs. Syn, eskertpelerdı nazarǧa alyp, üilerdıŋ ainalasyn abattandyruǧa basa nazar audaru qajet. Gazonmen qatar, aǧaştar egıluı jäne uaqytymen baptaluy tiıs”, – dedı Ömırzaq Şökeev.
“Adyrna” ūlttyq portaly
Ūqsas jaŋalyqtar
