«ادىلدىكتى تالاپ ەت!» ناۋقانى باستالدى

1856
Adyrna.kz Telegram

14 شىلدەدە ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ جول سالاسىندا سىبايلاس جەمقورلىق تاۋەكەلدەرىنىڭ جوعارى ەكەنىن اتاپ، سوڭعى ون جىلدا سالىنعان جولدارداعى بۇزۋشىلىقتاردى مۇقيات تەكسەرۋدى تالاپ ەتكەن بولاتىن. «ەلىمىزدىڭ جولدارى ناشار ەكەنى جانە جول قۇرىلىسى سالاسىن جەمقورلىق جايلاعانى ەشكىمگە جاسىرىن ەمەس... جولدىڭ ناشار ساپاسىنا قاتىسى بار بارلىق كىنالىلەردى زاڭعا سايكەس جاۋاپكەرشىلىككە تارتۋ قاجەت»،- دەدى ەل پرەزيدەنتى.

قازاقستانداعى جول سالاسىنىڭ قالىڭ جۇرتشىلىق ىشىندە سىننان كوز اشپايتىنى بەلگىلى. اۆتو جولداردىڭ ساپاسى ناشار بولۋى تەك جۇرگىزۋشىلەرگە اۋىرلىق تۋدىرتىپ قانا قويماي، سونىمەن قاتار ەل ەكونوميكاسىنىڭ دامۋىنا كەرى اسەرىن تيگىزەتىنى انىق. ونىمەن قوسا، ساپاسىز جولداردىڭ سالدارىنان كولىك اپاتتارى ورىن الىپ، ازاماتتاردىڭ دەنساۋلىعى مەن ومىرىنە دە تىكەلەي اسەر ەتىپ وتىرعانى جاسىرىن ەمەس.

World Economic Forum (الەمدىك ەكونوميكالىق فورۋم) الەمدەگى ەكونوميكالىق جاعدايعا قاتىستى ەسەبىندە ءار ەلدەگى اۆتو جولداردىڭ ساپاسى جايىندا قورىتىندى بەرەدى. 2022 جىلعى ەسەپ بويىنشا 141 ەلدىڭ قاتارىندا قازاقستان 93-ءشى ورىن العان. ايتا كەتۋ كەرەك، بۇل تىزىمدە كەنيا جانە تانزانيا سەكىلدى افريكا ەلدەرى قازاقستاننان كوش ىلگەرىدە ورنالاسقان.

تەك تۇركىستان وبلىسىندا 2021 جىلى اۆتو جولدارعا 81 029 262 984 تەڭگە ءبولىنىپ، ونىڭ 23,5 ميلليارد قۇرىلىس، 34,2 ميلليارد جوندەۋ جۇمىستارى، ال جولداردى كۇتىپ ۇستاۋعا 23,2 ميللياردى تەڭگە جۇمسالعان. الايدا وبلىستاعى جولداردىڭ ساپاسىنا قالىڭ جۇرتشىلىقتىڭ كوڭىلى تولار ەمەس.

وسىعان وراي، «ادىلدىك جولى» رەسپۋبليكالىق قوعامدىق بىرلەستىگى مەن قر سىبايلاس جەمقورلىققا قارسى ءىس-قيمىل اگەنتتىگىمەن بىرلەسە وتىرىپ «ادىلدىكتى تالاپ ەت!» ناۋقانىن باستادى.

ناۋقاننىڭ باستى ماقساتى- قوعامداعى جەمقورلىققا توزىمسىزدىك مادەنيەتىن قالىپتاستىرىپ، بۇل ۇردىسكە ازاماتتاردى بارىنشا جۇمىلدىرۋ. ناۋقان اياسىندا جەمقورلىق تاۋەكەلدەرى جوعارى، ەلدى الاڭداتاتىن ماسەلەلەردى قامتيتىن بولادى.

شارانىڭ العاشقى كەزەڭىندە اۆتو جولدار سالاسىنداعى قۇرىلىس، جوندەۋ جانە كۇتىپ ۇستاۋ بارىسىنداعى جەمقورلىق تاۋەكەلدەرىن انىقتاۋعا باعىتتالعان. ناۋقانعا ازاماتتار adildik.kz سايتى ارقىلى نەمەسە 1463 Call center بويىنشا حابارلاسىپ، اۆتو جولدار سالاسىنداعى جەمقورلىق ماسەلەلەرىن 15 تامىزدان باستاپ حابارلاي الادى.

جينالعان اقپارات وبلىستىق جانە رەسپۋبليكالىق «ادىلدىك كەڭەسى» وتىرىستارىندا تالقىلانىپ، ءنورماتيۆتى-قۇقىقتىق اكتىلەردى جەتىلدىرۋ ماقساتىندا قورىتىندىنى ۋاكىلەتتى ورگاندارعا ۇسىناتىن بولادى.

 

 

پىكىرلەر