14 şıldede Ükımettıŋ keŋeitılgen otyrysynda Prezident Qasym-Jomart Toqaev jol salasynda sybailas jemqorlyq täuekelderınıŋ joǧary ekenın atap, soŋǧy on jylda salynǧan joldardaǧy būzuşylyqtardy mūqiiat tekserudı talap etken bolatyn. «Elımızdıŋ joldary naşar ekenı jäne jol qūrylysy salasyn jemqorlyq jailaǧany eşkımge jasyryn emes... Joldyŋ naşar sapasyna qatysy bar barlyq kınälılerdı Zaŋǧa säikes jauapkerşılıkke tartu qajet»,- dedı el Prezidentı.
Qazaqstandaǧy jol salasynyŋ qalyŋ jūrtşylyq ışınde synnan köz aşpaityny belgılı. Avto joldardyŋ sapasy naşar boluy tek jürgızuşılerge auyrlyq tudyrtyp qana qoimai, sonymen qatar el ekonomikasynyŋ damuyna kerı äserın tigızetını anyq. Onymen qosa, sapasyz joldardyŋ saldarynan kölık apattary oryn alyp, azamattardyŋ densaulyǧy men ömırıne de tıkelei äser etıp otyrǧany jasyryn emes.
World Economic Forum (Älemdık ekonomikalyq forum) älemdegı ekonomikalyq jaǧdaiǧa qatysty esebınde är eldegı avto joldardyŋ sapasy jaiynda qorytyndy beredı. 2022 jylǧy esep boiynşa 141 eldıŋ qatarynda Qazaqstan 93-şı oryn alǧan. Aita ketu kerek, būl tızımde Keniia jäne Tanzaniia sekıldı Afrika elderı Qazaqstannan köş ılgerıde ornalasqan.Tek Türkıstan oblysynda 2021 jyly avto joldarǧa 81 029 262 984 teŋge bölınıp, onyŋ 23,5 milliard qūrylys, 34,2 milliard jöndeu jūmystary, al joldardy kütıp ūstauǧa 23,2 milliardy teŋge jūmsalǧan. Alaida oblystaǧy joldardyŋ sapasyna qalyŋ jūrtşylyqtyŋ köŋılı tolar emes. Osyǧan orai, «Ädıldık joly» Respublikalyq qoǧamdyq bırlestıgı men QR Sybailas jemqorlyqqa qarsy ıs-qimyl agenttıgımen bırlese otyryp «Ädıldıktı talap et!» nauqanyn bastady.
Nauqannyŋ basty maqsaty- qoǧamdaǧy jemqorlyqqa tözımsızdık mädenietın qalyptastyryp, būl ürdıske azamattardy barynşa jūmyldyru. Nauqan aiasynda jemqorlyq täuekelderı joǧary, eldı alaŋdatatyn mäselelerdı qamtityn bolady.Şaranyŋ alǧaşqy kezeŋınde avto joldar salasyndaǧy qūrylys, jöndeu jäne kütıp ūstau barysyndaǧy jemqorlyq täuekelderın anyqtauǧa baǧyttalǧan. Nauqanǧa azamattar adildik.kz saity arqyly nemese 1463 Call center boiynşa habarlasyp, avto joldar salasyndaǧy jemqorlyq mäselelerın 15 tamyzdan bastap habarlai alady. Jinalǧan aqparat oblystyq jäne respublikalyq «Ädıldık keŋesı» otyrystarynda talqylanyp, normativtı-qūqyqtyq aktılerdı jetıldıru maqsatynda qorytyndyny uäkılettı organdarǧa ūsynatyn bolady.
