قر پرەمەر-ءمينيسترى ءاليحان سمايىلوۆ ساۋدا جانە ينتەگراتسيا مينيسترلىگىنىڭ ۇجىمىنا جاڭا باسشى – پرەمەر-مينيستر ورىنباسارىنىڭ مىندەتىن اتقارۋشى – قر ساۋدا جانە ينتەگراتسيا ءمينيسترى سەرىك جۇمانعاريندى تانىستىردى، دەپ جازادى "ادىرنا" ۇلتتىق پورتالى.
ۇكىمەت باسشىسى بۇگىنگە دەيىن باسەكەلەستىكتى قورعاۋ جانە دامىتۋ اگەنتتىگىن باسقارعان سەرىك جۇمانعاريننىڭ باسشىلىق قىزمەتتە ۇلكەن تاجىريبەسى بار ەكەنىن اتاپ ءوتتى.
«سەرىك ماقاشۇلى – جاۋاپتى جانە تالاپتى ادام، ونىڭ ءوزىن وسىنداي جاۋاپتى قىزمەتتە كورسەتە الاتىنىنا سەنىمدىمىن»، — دەدى ءاليحان سمايىلوۆ.
پرەمەر-ءمينيستردىڭ ايتۋىنشا، مەملەكەت باسشىسى ەكونوميكانى دامىتۋدا، كورشى ەلدەرمەن تىعىز ەكونوميكالىق جانە ينتەگراتسيالىق بايلانىستاردى نىعايتۋدا ساۋدا سالاسىنىڭ ماڭىزى زور ەكەنىن اتاپ وتكەن.
«مينيسترلىكتىڭ الدىندا ماڭىزدى مىندەتتەر تۇر. ارينە، بۇل ىشكى ساۋدانى دامىتۋ جانە رەتتەۋ، ساۋدا ينفراقۇرىلىمىن جەتىلدىرۋ، بيرجالىق جانە ەلەكتروندىق ساۋدانى كەڭەيتۋ»، — دەدى ءاليحان سمايىلوۆ.
ۇكىمەت باسشىسىنىڭ سوزىنشە، وعان قوسا تۇتىنۋشىلاردىڭ قۇقىقتارىن قورعاۋعا، شيكىزاتتىق ەمەس تاۋارلار مەن قىزمەتتەر ەكسپورتىن دامىتۋعا جانە ىلگەرىلەتۋگە، سونداي-اق تەحنيكالىق رەتتەۋ جانە ستاندارتتاۋ سالاسىنداعى جۇمىسقا ۇلكەن نازار اۋدارۋ قاجەت.
«الەۋمەتتىك ماڭىزى بار تاۋارلار باعالارىن مونيتورينگتەۋ جانە ولاردى تۇراقتاندىرۋ جونىندە شارالار ازىرلەۋ – قوعامداعى ەرەكشە نازار اۋدارۋدى قاجەت ەتەتىن ماسەلە. سەرىك ماقاشۇلى، مەملەكەت باسشىسىنىڭ جوعارى سەنىمىن اقتايسىز دەپ ۇمىتتەنەمىز»، — دەپ تۇيىندەدى پرەمەر-مينيستر.
ۆەدومستۆونىڭ بۇرىنعى باسشىسى باقىت سۇلتانوۆ ساۋدا جانە ينتەگراتسيا مينيسترلىگىنىڭ ۇجىمىنا بىرلەسكەن جۇمىس ءۇشىن العىس ايتىپ، سەرىك جۇمانعارينگە جاڭا قىزمەتىندە تابىس تىلەدى.
"ادىرنا" ۇلتتىق پورتالى
