ءماجىلىستىڭ بۇرىنعى سپيكەرى نۇرلان نىعماتۋلين مەن ونىڭ ەگىز ءىنىسى ەرلان رەيدەرلىك باسىپ الۋ قىلمىستىق ءىسى بويىنشا تەكسەرىلىپ جاتىر، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
«استاناداعى سىبايلاس جەمقورلىققا قارسى قىزمەتتىڭ ورتالىق اپپاراتى بالقاش وقيعاسى جانە ەكى ءىرى كاسىپكەر – قۋات سۇلتانبەكوۆ پەن ەرلان نىعماتۋلين اراسىنداعى ءوزارا قارىم-قاتىناسقا قاتىستى ءىستى زەرتتەۋدە. ول 2022 جىلدىڭ ساۋىرىندە باستالدى. وسى ءىس اياسىندا سۇلتانبەكوۆ جابىرلەنۋشى دەپ تانىلدى. دەمالىس ايماعىنا بايلانىستى جانە وزگە دە دەرەكتەردى ايتا المايمىن. تەرگەۋ ءجۇرىپ جاتىر، جەدەل توپ قۇرىلدى. وسى ىسكە نىعماتۋليندەردىڭ قانشالىقتى قاتىسى بار ەكەندىگى زەرتتەلىپ جاتىر»، - دەدى ەلوردالىق ادۆوكاتتار القاسىنىڭ ادۆوكاتى ماۋلەن الىمباەۆ.
2012 جىلى ەرلان نىعماتۋلينمەن بولعان جانجالدان كەيىن بالقاشتىق كاسىپكەر قۋات سۇلتانبەكوۆ 21 جىلعا باس بوستاندىعىنان ايىرىلدى. ونىڭ 10 جىلىن وتەدى.
قاراعاندى وبلىسى كاسىپكەرلەر پالاتاسىنىڭ وڭىرلىك كەڭەسىنىڭ مۇشەسى نيكولاي ابتتىڭ ايتۋىنشا، كاسىپكەر مەن نىعماتۋلين اراسىنداعى كيكىلجىڭ سۇلتانبەكوۆتىڭ 2011 جىلى قالاداعى جەمقورلىق ماسەلەسىن بەلسەندى تۇردە كوتەرۋىنەن باستالعان. كەيىن بالقاش پروكۋراتۋراسى قالانى اباتتاندىرۋ بويىنشا تەندەرلەر وتكىزۋ كەزىندەگى ورەسكەل زاڭ بۇزۋشىلىقتاردى انىقتادى. قاراعاندى وبلىسى بويىنشا قارجى پوليتسيا دەپارتامەنتى جۇرگىزگەن ساراپتامادان سوڭ مەملەكەتتىك تاپسىرىس نەگىزىندە رەسپۋبليكا قاراجاتىنىڭ شىعىندالعانى انىقتالدى.
2012 جىلدىڭ 27 قاڭتارىندا سۇلتانبەكوۆ بالقاشتان ەلورداعا بارار جولدا قارۋدى زاڭسىز ساقتاۋ جانە الىپ ءجۇرۋ كۇدىگىمەن تەكسەرىلىپ، ۇستالدى. تەرگەۋ التى كۇندە اياقتالدى جانە كاسىپكەر 3,5 جىلعا باس بوستاندىعىنان ايىرىلدى. كەيىننەن جازاسىن وتەۋ مەرىزىمى 21 جىلعا سوزىلدى. ويتكەنى، قىلمىستىق-تۇزەتۋ مەكەمەسىندە سۇلتانبەكوۆكە قاتىستى تاعى بەس قىلمىستىق ءىس قوزعالدى. 2022 جىلى 10 جىل قاماۋدا بولعاننان كەيىن كاسىپكەرگە قاتىستى ءۇش قىلمىستىق ءىس قايتا قارالدى، اقىرى اقتالىپ، بوساتىلعان.
جابىرلەنۋشىنىڭ ادۆوكاتى يۋليا دجافاروۆانىڭ ايتۋىنشا، سۇلتانبەكوۆكە قاتىستى بارلىق ءىس ويدان شىعارىلعان.
«سۇلتانبەكوۆ ءىسى بويىنشا جابىرلەنۋشى دەپ تانىلعان سوتتالعاندارعا قىلمىستىق-اتقارۋ جۇيەسىنىڭ قىزمەتكەرلەرى قاساقانا دەنە جاراقاتىن سالعان. سوسىن ولارعا قىسىم كورسەتىپ، سۇلتانبەكوۆكە قارسى ارىز جازۋعا ماجبۇرلەگەن. (...) 2022 جىلعى 27 شىلدەدە شىعىس قازاقستان وبلىسىنىڭ سوت القاسى سۇلتانبەكوۆكە قاتىستى وسكەمەن قالاسىندا بۇرمالانعان قىلمىستىق ىستەر بويىنشا ءۇش ۇكىمنىڭ كۇشىن جويدى»، - دەدى ادۆوكات.
قورعاۋشى تاراپ قالعان ءۇش ءىس بويىنشا سۇلتانبەكوۆتىڭ كىناسىزدىگىن دالەلدەۋگە ۇمىتتەنەدى.
«التى ءىستىڭ دە ءوز ۋچاسكەلەرىندە وزىندىك ەرەكشەلىكتەرى بار جانە ولاردى بىردەن جويۋ مۇمكىن ەمەس، سۇلتانبەكوۆتى وڭالتۋ بويىنشا جۇمىس جالعاسۋدا. ءۇش قىلمىستىق ءىس قالدى، ونىڭ ءبىرى 2012 جىلعى ءىس»، - دەدى ماۋلەن الىمباەۆ.
الىمباەۆ نىعماتۋليندەردىڭ قازاقستانداعى ىقپالى ساقتالدى ما دەگەن سۇراققا دا جاۋاپ بەردى.
«ونى ۋاقىت كورسەتەدى. بىراق قالاي بولعاندا دا ءىستىڭ باسى كوتەرىلدى، ءوندىرىس ءجۇرىپ جاتىر. اعايىندىلاردىڭ زاڭسىز ارەكەتتەرى تۋرالى فاكتىلەر انىقتالدى»، - دەپ تۇيىندەدى ول.
