Májilistiń burynǵy spıkeri Nurlan Nyǵmatýlın men onyń egiz inisi Erlan reıderlik basyp alý qylmystyq isi boıynsha tekserilip jatyr, dep habarlaıdy «Adyrna» tilshisi QazTAG-qa silteme jasap.
«Astanadaǵy sybaılas jemqorlyqqa qarsy qyzmettiń ortalyq apparaty Balqash oqıǵasy jáne eki iri kásipker – Qýat Sultanbekov pen Erlan Nyǵmatýlın arasyndaǵy ózara qarym-qatynasqa qatysty isti zertteýde. Ol 2022 jyldyń sáýirinde bastaldy. Osy is aıasynda Sultanbekov jábirlenýshi dep tanyldy. Demalys aımaǵyna baılanysty jáne ózge de derekterdi aıta almaımyn. Tergeý júrip jatyr, jedel top quryldy. Osy iske Nyǵmatýlınderdiń qanshalyqty qatysy bar ekendigi zerttelip jatyr», - dedi elordalyq advokattar alqasynyń advokaty Máýlen Álimbaev.
2012 jyly Erlan Nyǵmatýlınmen bolǵan janjaldan keıin balqashtyq kásipker Qýat Sultanbekov 21 jylǵa bas bostandyǵynan aıyryldy. Onyń 10 jylyn ótedi.
Qaraǵandy oblysy Kásipkerler palatasynyń óńirlik keńesiniń múshesi Nıkolaı Abttyń aıtýynsha, kásipker men Nyǵmatýlın arasyndaǵy kıkiljiń Sultanbekovtyń 2011 jyly qaladaǵy jemqorlyq máselesin belsendi túrde kóterýinen bastalǵan. Keıin Balqash prokýratýrasy qalany abattandyrý boıynsha tenderler ótkizý kezindegi óreskel zań buzýshylyqtardy anyqtady. Qaraǵandy oblysy boıynsha qarjy polıııa departamenti júrgizgen saraptamadan soń memlekettik tapsyrys negizinde respýblıka qarajatynyń shyǵyndalǵany anyqtaldy.
2012 jyldyń 27 qańtarynda Sultanbekov Balqashtan elordaǵa barar jolda qarýdy zańsyz saqtaý jáne alyp júrý kúdigimen tekserilip, ustaldy. Tergeý alty kúnde aıaqtaldy jáne kásipker 3,5 jylǵa bas bostandyǵynan aıyryldy. Keıinnen jazasyn óteý merizimi 21 jylǵa sozyldy. Óıtkeni, qylmystyq-túzetý mekemesinde Sultanbekovke qatysty taǵy bes qylmystyq is qozǵaldy. 2022 jyly 10 jyl qamaýda bolǵannan keıin kásipkerge qatysty úsh qylmystyq is qaıta qaraldy, aqyry aqtalyp, bosatylǵan.
Jábirlenýshiniń advokaty Iýlııa Djafarovanyń aıtýynsha, Sultanbekovke qatysty barlyq is oıdan shyǵarylǵan.
«Sultanbekov isi boıynsha jábirlenýshi dep tanylǵan sottalǵandarǵa qylmystyq-atqarý júıesiniń qyzmetkerleri qasaqana dene jaraqatyn salǵan. Sosyn olarǵa qysym kórsetip, Sultanbekovke qarsy aryz jazýǵa májbúrlegen. (...) 2022 jylǵy 27 shildede Shyǵys Qazaqstan oblysynyń sot alqasy Sultanbekovke qatysty Óskemen qalasynda burmalanǵan qylmystyq ister boıynsha úsh úkimniń kúshin joıdy», - dedi advokat.
Qorǵaýshy tarap qalǵan úsh is boıynsha Sultanbekovtiń kinásizdigin dáleldeýge úmittenedi.
«Alty istiń de óz ýchaskelerinde ózindik erekshelikteri bar jáne olardy birden joıý múmkin emes, Sultanbekovty ońaltý boıynsha jumys jalǵasýda. Úsh qylmystyq is qaldy, onyń biri 2012 jylǵy is», - dedi Máýlen Álimbaev.
Álimbaev Nyǵmatýlınderdiń Qazaqstandaǵy yqpaly saqtaldy ma degen suraqqa da jaýap berdi.
«Ony ýaqyt kórsetedi. Biraq qalaı bolǵanda da istiń basy kóterildi, óndiris júrip jatyr. Aǵaıyndylardyń zańsyz áreketteri týraly faktiler anyqtaldy», - dep túıindedi ol.
