سۋرەت: جي
پرەزيدەنتتىڭ كەڭەسشىسى – ءباسپاسوز حاتشىسى ايبەك سماديار ۇقك توراعاسى بولعان ەرمەك ساعىمباەۆتىڭ نە سەبەپتى قىزمەتىنەن بوساتىلعانىن ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، مەملەكەت باسشىسىنىڭ شەشىمىنە ارنايى قىزمەتتى رەفورمالاۋ مىندەتتەرىن ءتيىمدى ورىنداۋ ءۇشىن باسشىلىق قۇرامدا كادرلىق وزگەرىستەر ەنگىزۋ قاجەتتىگى نەگىز بولعان.
«پرەزيدەنت قاسىم-جومارت توقاەۆ ەرمەك ساعىمباەۆتى قىزمەتتەن بوساتۋ تۋرالى شەشىم قابىلداعاندا جەمقورلىق وقيعاسىنا قاتىسى بار لاۋازىمدى تۇلعالاردى ۇستاۋ جاعدايىن دا ەسكەردى. پرەزيدەنتتىڭ پىكىرىنشە، كۇشتىك قۇرىلىم قىزمەتكەرلەرى قاتەلىكتەر جىبەرگەن. وسىعان بايلانىستى ىشكى ىستەر ءمينيسترى ەرجان سادەنوۆكە قىزمەتتىك ەسكەرتۋ جاريالاندى.
جالپى «سامۇرىق-قازىنا» قورى مەن «قازاقستان تەمىر جولى» كومپانياسى باسشىلارىنىڭ ىسىندەگى كوررۋپتسيالىق سيپات ەش كۇمان تۋدىرمايدى. ونى تەرگەۋ شارالارى كەزىندەگى فيگۋرانتتاردىڭ ارەكەتتەرى راستادى. پرەزيدەنت جۇرگىزىلىپ جاتقان تەرگەۋ امالدارىنان اۋەل باستان حاباردار بولدى. مەملەكەت باسشىسىنىڭ جەمقورلىققا قارسى كۇرەسكە قاتىستى بەرىك ۇستانىمى وزگەرمەيدى»،– دەپ جازدى سماديار.
سونداي-اق ول بۇگىن مەملەكەت باسشىسىنىڭ ىشكى ىستەر مينيسترلىگىنىڭ باسشىلىق قۇرامىمەن جيىن وتكىزگەنىن اتاپ ءوتتى.
«پرەزيدەنت قىزمەتتىك ءتارتىپتى نىعايتۋدى، «زاڭ مەن ءتارتىپ» قاعيداتىنا ساي قوعامدىق قاۋىپسىزدىكتى قامتاماسىز ەتۋگە قاتىستى مىندەتتەردى اتقارۋ بارىسىندا پوليتسيانىڭ كاسىبي دايارلىق دەڭگەيىن كوتەرۋدى تاپسىردى.
مينيستر ەرجان سادەنوۆكە پوليتسيانىڭ قاتارداعى قىزمەتكەرلەرى مەن وفيتسەرلىك قۇرامى اراسىندا تاربيە جۇمىستارىن كۇشەيتۋ كەرەك ەكەنى ايتىلدى»،– دەپ تولىقتىردى ءباسپاسوز حاتشىسى.
بۇعان دەيىن ۇلتتىق قاۋىپسىزدىك كوميتەتىنىڭ توراعاسىنىڭ اۋىسقانىن جازعان ەدىك.
