قازاقستاندىق «قىزىل - جار» فۋتبول كلۋبىنىڭ بۇرىنعى پرەزيدەنتى گريگوري لورياعا مەملەكەتارالىق ىزدەۋ جاريالاندى. بۇل تۋرالى 11 قاراشادا قما جازدى، دەپ حابارلايدى «ادىرنا» ءتىلشىسى.
ول 414 ملن تەڭگەدەن استام بيۋدجەت قاراجاتىن جىمقىردى جانە سالىق تولەۋدەن جالتاردى دەگەن كۇدىككە ىلىنگەن.
ۆەدومستۆونىڭ مالىمەتىنشە، گريگوري لوريا فۋتبول كلۋبىن باسقارعان كەزەڭدە بيۋدجەت قاراجاتىن زاڭسىز يەمدەنۋ سحەماسىن ۇيىمداستىرعان. اتاپ ايتقاندا، كۇدىكتى باس بۋحگالتەرمەن جانە وزگە دە تۇلعالارمەن الدىن الا ءسوز بايلاسىپ، جالعان قارجىلىق قۇجاتتاردى پايدالانعان. سونداي-اق قاراجاتتىڭ جەكە شوتتارعا نەگىزسىز اۋدارىلۋىن ۇيىمداستىرىپ، بۋحگالتەرلىك جانە سالىق ەسەپتىلىگىنە جالعان مالىمەتتەر ەنگىزۋدى قامتاماسىز ەتكەن.
تەرگەۋ دەرەگىنە سايكەس، سالىق دەكلاراتسيالارىندا قىزمەتكەرلەردىڭ تابىسى، ەڭبەكاقى تولەۋ قورى مەن ۇيىمنىڭ جىلدىق جيىنتىق تابىسى تومەندەتىلىپ كورسەتىلگەن.
ايتا كەتەيىك، 2023 جىلى «قىزىل-جار سق» فۋتبول كلۋبىنىڭ قىزمەتىن قارجىلاندىرۋعا جەرگىلىكتى بيۋدجەتتەن 1,7 ملرد تەڭگە بولىنگەن.
