Foto: Reuters
Bırıkken Arab Ämırlıkterınıŋ astanasy Äbu-Dabide Ukraina, Resei jäne AQŞ ökılderınıŋ soǧysty toqtatuǧa baǧyttalǧan üşjaqty kelıssözınıŋ alǧaşqy künı aiaqtaldy, dep habarlaidy "Adyrna".
Kezdesu 11 qaraşada jalǧasady.
10 qaraşada ötken kelıssözder şamamen 4,5 saǧatqa sozylyp, 40 minuttyq üzılıs jasalǧan. Taraptar äzırge talqylau barysy men naqty nätijelerı turaly resmi mälımdeme jasaǧan joq.
Alaida «Ukrainskaia pravda» basylymyna ukrain delegasiiasyna jaqyn derekközdıŋ habarlauynşa, alǧaşqy künnıŋ qorytyndysynda taraptar jaqyn arada tūtqyndardy auqymdy kölemde almastyru turaly uaǧdalasqan.
Reuters agenttıgınıŋ Resei delegasiiasyndaǧy derekközı Mäskeu kelıssözderde soǧystan keiıngı Europanyŋ qauıpsızdık jüiesıne qatysty kelısımderdı negızgı taqyryp retınde köterudı josparlap otyrǧanyn aitqan.
AQŞ memlekettık hatşysy Marko Rubio Äbu-Dabidegı kezdesudı «öte nätijelı» dep baǧalady. Ol Ukrainadaǧy soǧysty toqtatuǧa baǧyttalǧan aldaǧy talqylaularǧa Europa elderınıŋ ökılderın de qatystyru qajet ekenın atap öttı.
«Ūzaq merzımdı perspektivada üşjaqty formatqa europalyq serıktesterımız de qosyluy kerek dep sanaimyz. Öitkenı olar būl mäselenı şeşudıŋ bır bölıgı», – dedı Marko Rubio.
Kezdesu ötetın jerde Europa memleketterınıŋ, NATO men Europalyq odaqtyŋ ökılderı de bolǧan. Alaida olar kelıssözder üstelıne qatyspaǧan.
Resei delegasiiasyn prezident kömekşısı Vladimir Medinskii bastap keldı. Onyŋ qūramynda Syrtqy ıster ministrınıŋ orynbasarlary Sergei Riabkov pen Mihail Galuzin, sondai-aq Resei Qaruly küşterı Bas ştabynyŋ ökılderı bar.
Al Ukraina delegasiiasyna ūlttyq qauıpsızdık jäne qorǧanys keŋesınıŋ hatşysy Rüstem Ömerov jetekşılık ettı. Delegasiia qūramynda Ukraina prezidentı keŋsesınıŋ basşysy Kirill Budanov, onyŋ bırınşı orynbasary Sergei Kislisa, Qorǧanys ministrlıgı Bas barlau basqarmasy basşysynyŋ orynbasary Vadim Skibiskii jäne Joǧarǧy Radadaǧy «Halyq qyzmetşısı» fraksiiasynyŋ jetekşısı David Arahamiia bar.
Aita keteiık, būl – Ukraina men Resei arasyndaǧy segız aidan keiıngı alǧaşqy kelıssöz. Būǧan deiıngı kezdesu aqpan aiynda Jenevada ötken. Alaida AQŞ pen İzraildıŋ İranǧa qarsy soǧysy bastaluyna bailanysty kelıssözder toqtatylǧan.
