قازاقستان حوككەي قۇراماسى قىتايدى جەڭدى

قازاقستاننىڭ حوككەي قۇراماسى ازيا چەمپيوناتىنداعى ەكىنشى كەزدەسۋىندە قىتاي كومانداسىن 5:0 ەسەبىمەن جەڭدى، دەپ حابارلايدى "ادىرنا" ۇلتتىق پورتالى.

ويىننىڭ العاشقى كەزەڭىندە ەسەپ اشىلعان جوق. تالعات جايلاۋوۆتىڭ شاكىرتتەرى قارسىلاس قاقپاسىنا 20 رەت سوققى باعىتتاعانىمەن، شايبا سوعا المادى.

ەسەپ ەكىنشى كەزەڭنىڭ 11-مينۋتىندا اشىلدى. سايان دانيار قارسىلاس كوماندا قۇرامىندا ءبىر ويىنشى كەم بولعان ءساتتى پايدالانىپ، قازاقستان قۇراماسىن العا شىعاردى. اراعا ءۇش مينۋت سالىپ، ول تاعى ءبىر شايبا سوعىپ، دۋبل اۆتورى اتاندى.

ءۇشىنشى كەزەڭ باستالعاننان كەيىن 33 سەكۋند وتكەندە ارتۋر گاتياتوۆ ەسەپتى 3:0-گە جەتكىزدى. كەزەڭنىڭ سەگىزىنشى مينۋتىندا وسكار يۋلباريسوۆ ءتورتىنشى شايبانى سوقتى. ال 13-مينۋتتا كيريلل نيكيتين سان باسىمدىعىن پايدالانىپ، قازاقستان قۇراماسىنىڭ بەسىنشى شايباسىن قارسىلاس قاقپاسىنا باعىتتادى.

وسىلايشا، كەزدەسۋ 5:0 ەسەبىمەن قازاقستان قۇراماسىنىڭ پايداسىنا اياقتالدى.

ايتا كەتەيىك، ازيا چەمپيوناتىندا قازاقستان قۇراماسىنىڭ ساپىندا «بارىس» كلۋبىنان تەك قاقپاشى ۆلاديسلاۆ نۋرەك ونەر كورسەتىپ ءجۇر. قالعان ويىنشىلار قازاقستان چەمپيوناتىنا قاتىساتىن كلۋبتاردان جاساقتالعان.

قازاقستان قۇراماسى 8 قاراشادا تۋرنيردەگى شەشۋشى كەزدەسۋىن وڭتۇستىك كورەياعا قارسى وتكىزەدى. بيىل قازاقستاندىق حوككەيشىلەر بىلتىر جەڭىپ العان ازيا چەمپيونى اتاعىن قورعاپ جاتىر.