كەنيادا «ىزگى حابار» سەكتاسىنىڭ جەتەكشىسى پول ماككەنزي 190 بالانى جانە ءبىر ەرەسەك ادامدى ولتىرۋگە قاتىسى بار قىلمىستارى ءۇشىن 200 جىلعا باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى.
CNN دەرەگىنشە، ونىڭ جاقتاستارىنىڭ مايىتتەرى ءالى دە تابىلىپ جاتىر. تەرگەۋ مالىمەتىنشە، قۇربانداردىڭ باسىم بولىگى كۇشتەپ اشتىق جاريالاتۋدىڭ سالدارىنان كوز جۇمعان.
مومباسا قالاسىنىڭ جوعارعى سوتى پول ماككەنزيگە 100 جىلدىق ەكى جازا تاعايىندادى. ونىڭ ءبىرىنشىسى – كۇشتەپ اشتىق جاريالاتۋدان بولعان ولىمدەرگە، ەكىنشىسى – جاقتاستارىن تىكەلەي ولتىرۋگە بايلانىستى. سونىمەن قاتار ونىڭ 28 سىبايلاسى دا ۇزاق مەرزىمگە سوتتالدى.
سۋديا ديانا كاۆەدزانىڭ ايتۋىنشا، سوت ايىپتالۋشىلارعا ءولىم جازاسىن تاعايىنداماعان. سەبەبى بۇل ولاردىڭ ءولىم ارقىلى يسامەن قاۋىشامىز دەگەن سەنىمىن ودان ءارى كۇشەيتۋى مۇمكىن ەدى. سونداي-اق ءالى تابىلماعان بالالاردىڭ سۇيەگىن ىزدەۋ جۇمىستارى جالعاسىپ جاتىر. سوتتالعانداردىڭ ءتىرى قالعاندارى ولاردىڭ جەرلەنگەن ورىندارىن انىقتاۋعا كومەكتەسۋى مۇمكىن. سوت وتىرىسى كەزىندە ايىپتالۋشىلاردىڭ باسىم بولىگى جاساعان ارەكەتتەرىنە وكىنبەگەن. ۇكىم جاريالانعان ساتتە سەكتا جەتەكشىسى كۇلىمسىرەپ وتىرعان.
سۋديانىڭ مالىمەتىنشە، قازا تاپقان 191 ادامنىڭ 161-ءى – توعىز جاسقا تولماعان بالالار. تاعى 22-ءسى 10-13 جاس ارالىعىندا، بەسەۋى 14-16 جاستا بولعان. قالعان ەكى ادامنىڭ جاسى انىقتالماعان. ساراپتاما ناتيجەسىندە 191 ادامنىڭ 183-ءى اشتىقتان كوز جۇمعانى انىقتالعان. ولاردىڭ 182-ءسى بالا، بىرەۋى ەرەسەك ادام بولعان. ال قالعان سەگىز بالا تۇنشىقتىرۋ نەمەسە ۇرىپ-سوعۋ سالدارىنان قازا تاپقان. سوتتا كۋالىك بەرگەن ءتىرى قالعان سەكتانتتار ورمانداعى جاپپاي ءولىمدى «يسامەن ۇيلەنۋ تويى» دەپ اتاعانىن ايتقان. ولار قازا تاپقانداردى «سەنىم قاھارماندارى» دەپ ساناعان.
پول ماككەنزي 2023 جىلدىڭ تامىزىندا اقىرزامان بولادى دەپ جاريالاپ، جۇماققا كىرۋ ءۇشىن جاقتاستارىن اشتىق جاريالاۋعا شاقىرعان. ول ادامداردىڭ ءولۋ ءتارتىبىن دە بەلگىلەگەن. الدىمەن بالالار، ودان كەيىن جاسوسپىرىمدەر مەن ايەلدەر كوز جۇمۋى كەرەك بولعان. ەر ادامدارعا وزگەلەردىڭ ءمايىتىن جەرلەۋ ءۇشىن ۇزاعىراق ءومىر ءسۇرۋ مىندەتتەلگەن. سودان كەيىن عانا ولاردىڭ ولۋىنە رۇقسات بەرىلگەن. ماككەنزي جاقتاستارىن ۇيلەرىن تاستاپ، كەنيانىڭ شىعىسىنداعى شاكاحولا ورمانىنا كوشۋگە كوندىرگەن. ونىڭ ايتۋىنشا، ورمانداعى ورازا ولاردى قۇدايعا جاقىنداتىپ، جۇماققا جەتۋگە دايىنداۋى ءتيىس بولعان. سەكتانتتاردىڭ ارەكەتىن ارنايى كۇزەتشىلەر باقىلاپ وتىرعان. ولار اشتىق جاريالاۋدى توقتاتۋعا رۇقسات بەرمەگەن. تاماق جەۋگە نەمەسە قاشۋعا تىرىسقاندار جازالانعان.
2023 جىلدىڭ ساۋىرىندە قۇقىق قورعاۋ ۇيىمدارى سەكتانتتاردىڭ جاپپاي قازا تاپقانى تۋرالى حابارلاعاننان كەيىن پول ماككەنزي ۇستالدى. پوليتسيا ورماندا جۇرگىزگەن وپەراتسيا بارىسىندا جۇزدەگەن تاياز قابىردى انىقتاپ، ادامداردىڭ سۇيەگىن تاپقان. سول جىلدىڭ قازان ايىندا وعان رەسمي تۇردە ايىپ تاعىلعان.
