الماتىدا رەسەيلىك ءانشى ۆالەري مەلادزەنىڭ كونتسەرتى كەزىندە ءۇش ايەل اراسىندا جانجال شىقتى، دەپ حابارلايدى “ادىرنا”.
ولاردى قاۋىپسىزدىك قىزمەتكەرلەرى كونتسەرت وتەتىن اۋماقتان شىعارىپ جىبەردى.
الماتى پوليتسياسىنىڭ مالىمەتىنشە، وقيعاعا قاتىسقان ءۇش ايەلدىڭ جەكە باسى انىقتالعان. ولاردىڭ ەكەۋى الماتى وبلىسىنىڭ تۇرعىندارى. بىرەۋى سوت شەشىمىمەن 5 تاۋلىككە اكىمشىلىك قاماققا الىنسا، ەكىنشىسىنە قوعامدىق ورىندا الكوگولدىك ماساڭ كۇيدە جۇرگەنى ءۇشىن ايىپپۇل سالىندى.
ال تاراز قالاسىنىڭ تۇرعىنىنا قاتىستى ۇساق بۇزاقىلىق دەرەگى بويىنشا اكىمشىلىك ءىس قوزعالىپ، ماتەريالدار سوتقا جولداندى.
سونىمەن قاتار الەۋمەتتىك جەلىلەردە كونتسەرتتىڭ توقتاتىلعانى تۋرالى جالعان اقپارات تاراعان. پوليتسيا Instagram پاراقشاسىنىڭ يەسىن انىقتاپ، وعان جالعان اقپارات تاراتقانى ءۇشىن اكىمشىلىك ايىپپۇل سالدى.
قۇقىق قورعاۋ ورگاندارى قوعامدىق ءتارتىپتى بۇزۋ جانە كورىنەۋ جالعان اقپارات تاراتۋ زاڭ بويىنشا جاۋاپكەرشىلىككە اكەپ سوعاتىنىن ەسكەرتتى.
