مەملەكەت باسشىسى قۇرعان كوميسسيا قازاقستان رەسپۋبليكاسى قورعانىس مينيسترلىگىنىڭ قىزمەتىن كەشەندى تەكسەرۋدىڭ ارالىق قورىتىندىلارىن ۇسىندى.
تەكسەرۋ قورعانىس ۆەدومستۆوسىنىڭ 104 نىسانىن قامتىدى. بيۋدجەت قاراجاتىن پايدالانۋ تيىمدىلىگىنە اۋديت جۇرگىزۋ جالعاسۋدا.
كوميسسيا جۇمىسى اياسىندا قاۋىپسىزدىكتى قامتاماسىز ەتۋگە، اسكەري قىزمەت وتكەرۋگە ءتيىستى جاعداي جاساۋعا، ازىق-تۇلىكپەن جانە كيىم-كەشەكپەن جابدىقتاۋدىڭ، مەديتسينالىق كومەك كورسەتۋدىڭ ساپاسىنا، سونداي-اق مەملەكەتتىك مۇلىكتىڭ ساقتالۋىنا باسا نازار اۋدارىلىپ وتىر.
انىقتالعان جەكەلەگەن قۇقىق بۇزۋشىلىق دەرەكتەرى بويىنشا سوتقا دەيىنگى تەرگەپ-تەكسەرۋ باستالدى.
قازىرگى ۋاقىتتا قىلمىستىق قۋدالاۋ ورگاندارىنىڭ قاراۋىندا 37 ءىس بار. تەرگەۋ مۇددەسىنە بايلانىستى بۇل ىستەر جونىندەگى مالىمەتتەر ازىرگە جاريا ەتىلمەيدى.
تەكسەرۋ «زاڭ جانە ءتارتىپ» قاعيداتى نەگىزىندە جۇرگىزىلۋدە. ونىڭ ماقساتى – قارۋلى كۇشتەردىڭ جاۋىنگەرلىك ازىرلىگىن قامتاماسىز ەتۋ جانە اسكەري ءتارتىپتى نىعايتۋ ءۇشىن جۇيەلى شارالار ازىرلەۋ.
كوميسسيانىڭ ۇسىنىمدارى اسكەري رەفورما جوسپارىن ىسكە اسىرۋ بارىسىندا دا پايدالانىلىپ وتىر.
كوميسسيا جۇمىسى بيىلعى قاراشادا اياقتالادى.
ەسكە سالايىق، 24 قىركۇيەكتە ماڭعىستاۋ وبلىسىندا اسكەري-تەڭىز وقۋ-جاتتىعۋى كەزىندە قايعىلى وقيعا بولعان. جاعالاۋدا وقۋ-جاۋىنگەرلىك تاپسىرمالاردى ورىنداۋ بارىسىندا اۋا رايى كۇرت بۇزىلىپ، جەل كۇشەيگەن. سونىڭ سالدارىنان تەڭىزدە 17 اسكەري قىزمەتشى قالىپ قويعان. ولاردىڭ ۇشەۋى قۇتقارىلىپ، 14-ءى قازا تاپتى.
وقيعادان كەيىن مەملەكەت باسشىسى قاسىم-جومارت توقاەۆ قورعانىس مينيسترلىگىنە كەشەندى تەكسەرۋ جۇرگىزۋدى تاپسىردى. پرەزيدەنت اسكەردەگى جۇيەلى ماسەلەلەرگە نازار اۋدارىپ، اسكەري قىزمەتشىلەردىڭ قازا بولۋىن وفيتسەرلەردىڭ، سونىڭ ىشىندە گەنەرالداردىڭ كاسىبي مىندەتتەرىن تيىسىنشە ورىنداماۋىمەن بايلانىستىردى. 21 قازاندا قاۋىپسىزدىك كەڭەسىنىڭ وتىرىسىندا اسكەري رەفورمانىڭ جوسپارى ماقۇلداندى. ال 24 قازاندا قورعانىس مينيسترلىگى رەفورمانى ىسكە اسىرۋ جۇمىستارى باستالعانىن حابارلادى.
