مەملەكەت باسشىسىنىڭ جارلىعىمەن قازاقستاننىڭ ماروككو كورولدىگى مەن كۋبا رەسپۋبليكاسىنداعى توتەنشە جانە وكىلەتتى ەلشىلەرى تاعايىندالدى، دەپ حابارلايدى "ادىرنا" ۇلتتىق پورتالى.
اينۇر نۇرلانقىزى دانەنوۆا قازاقستاننىڭ ماروككو كورولدىگىندەگى توتەنشە جانە وكىلەتتى ەلشىسى بولىپ تاعايىندالدى. ال ولجاس ءازىلۇلى يسابەكوۆ قازاقستاننىڭ كۋبا رەسپۋبليكاسىنداعى توتەنشە جانە وكىلەتتى ەلشىسى قىزمەتىنە كىرىستى.
سونىمەن قاتار مەملەكەت باسشىسىنىڭ جارلىعىمەن اندريان كوپماعامبەتوۆيچ ەلەمەسوۆ قازاقستاننىڭ كۋبا رەسپۋبليكاسىنداعى توتەنشە جانە وكىلەتتى ەلشىسى قىزمەتىنەن بوساتىلدى.
اينۇر دانەنوۆا 1980 جىلعى 7 جەلتوقساندا قوستاناي قالاسىندا دۇنيەگە كەلگەن. پاريجدەگى سوربوننا ۋنيۆەرسيتەتى مەن ءال-فارابي اتىنداعى قازاق ۇلتتىق ۋنيۆەرسيتەتىن تامامداعان. ول 2003–2011 جىلدارى حالىقارالىق كوشى-قون ۇيىمى، بۇۇ دۇنيەجۇزىلىك تۋريستىك ۇيىمى، بۇۇ دامۋ باعدارلاماسى جانە بۇۇ بوسقىندار ىستەرى جونىندەگى جوعارعى كوميسسارى باسقارماسىنىڭ قازاقستانداعى قۇرىلىمدارىندا جۇمىس ىستەگەن. 2014–2019 جىلدارى قازاقستاننىڭ جەنەۆاداعى بۇۇ جانە باسقا دا حالىقارالىق ۇيىمدار جانىنداعى تۇراقتى وكىلدىگىندە ەكىنشى جانە ءبىرىنشى حاتشى قىزمەتتەرىن اتقارعان. كەيىن سىرتقى ىستەر ءمينيسترىنىڭ كەڭەسشىسى، گۋمانيتارلىق ىنتىماقتاستىق جانە ادام قۇقىقتارى باسقارماسىنىڭ باسشىسى بولعان. 2020–2025 جىلدارى قازاقستاننىڭ فرانتسياداعى ەلشىلىگىندە كەڭەسشى-ۋاكىل قىزمەتىن اتقاردى. فرانتسۋز، اعىلشىن جانە يسپان تىلدەرىن مەڭگەرگەن.
ولجاس يسابەكوۆ 1979 جىلعى 26 ماۋسىمدا دۇنيەگە كەلگەن. شاكارىم اتىنداعى سەمەي مەملەكەتتىك ۋنيۆەرسيتەتى مەن رەسەي سىرتقى ىستەر مينيسترلىگىنىڭ ديپلوماتيالىق اكادەمياسىن بىتىرگەن. ديپلوماتيالىق قىزمەتىن 2000 جىلى قازاقستاننىڭ سىرتقى ىستەر مينيسترلىگىندە باستاعان. 2004–2012 جىلدارى قازاقستاننىڭ يسپانيا مەن اقش-تاعى ەلشىلىكتەرىندە جۇمىس ىستەگەن. 2012–2013 جىلدارى ConocoPhillips North Caspian Ltd. كومپانياسىنىڭ سىرتقى جانە ۇكىمەتتىك بايلانىستار جونىندەگى ديرەكتورى بولعان. 2013–2019 جىلدارى سىرتقى ىستەر مينيسترلىگىنىڭ سىرتقى ەكونوميكالىق ساياسات دەپارتامەنتىن باسقارعان. پرەمەر-مينيستر كەڭسەسىندە، قازاقستاننىڭ كۋبا مەن مەكسيكاداعى ەلشىلىكتەرىندە، سونداي-اق Kazenergy قاۋىمداستىعىندا قىزمەت اتقارعان.
