كاسپي تەڭىزىنىڭ قازاقستان جاعالاۋىندا جاڭا ارال انىقتالدى، دەپ حابارلايدى "ادىرنا" ۇلتتىق پورتالى.
ول قۇلالى ارالى ماڭىندا جۇرگىزىلگەن اۋە بارلاۋى كەزىندە بايقالعان. سوڭعى ءتورت-بەس جىلدا تەڭىز سۋىنىڭ تارتىلۋىنا بايلانىستى ونىڭ سولتۇستىك بولىگىندە بىرنەشە جاڭا قۇرلىق اۋماعى پايدا بولعان.
Khaleej Times باسىلىمى قازاق كاسپي تەڭىزى عىلىمي-زەرتتەۋ ينستيتۋتىنىڭ دەرەكتەرىنە سىلتەمە جاساپ، قازاقستان سەكتورىندا 1996–2025 جىلدارى تەڭىز دەڭگەيى شامامەن 2,45 مەترگە تومەندەگەنىن جازدى. ماماندار سۋ دەڭگەيىنىڭ تومەندەۋىنە وزەندەردەن كەلەتىن سۋ كولەمىنىڭ ازايۋى، كليماتتىڭ وزگەرۋى سالدارىنان بۋلانۋدىڭ كۇشەيۋى جانە ادام ارەكەتى اسەر ەتىپ وتىرعانىن ايتادى.
عالىمداردىڭ ەسكەرتۋىنشە، كاسپيدىڭ تايازدانۋى تەڭىز ەكوجۇيەسىنە كەرى اسەر ەتۋى مۇمكىن. اسىرەسە كاسپي يتبالىقتارى مەن بەكىرە تۇقىمداس بالىقتاردىڭ تىرشىلىك ورتاسىنا قاۋىپ تونەدى. سونىمەن قاتار سۋ دەڭگەيىنىڭ تومەندەۋى بالىق شارۋاشىلىعىنا، كەمە قاتىناسىنا جانە جاعالاۋداعى ينفراقۇرىلىمعا اسەر ەتۋى ىقتيمال.
ماماندار كاسپي تەڭىزىنىڭ ارال تەڭىزى سياقتى تولىقتاي جويىلىپ كەتۋ ىقتيمالدىعى تومەن ەكەنىن ايتادى. دەگەنمەن سۋ دەڭگەيى ءارى قاراي تومەندەسە، تەڭىزدىڭ سولتۇستىگىندەگى تاياز ايماقتاردا ەلەۋلى ەكولوگيالىق زارداپتار تۋىنداۋى مۇمكىن.
بۇعان دەيىن اقتاۋدا كاسپي تەڭىزىنىڭ تۇبىنەن توپىراق كوتەرىلىپ جاتقانى حابارلانعان ەدى.
