گەرمانيانىڭ اۋە كۇشتەرى مەن ناتو-عا مۇشە تاعى 16 ەلدىڭ بولىمشەلەرى يتاليادا وتەتىن Steadfast Noon يادرولىق وقۋ-جاتتىعۋلارىنا قاتىسادى. بۇل تۋرالى dpa جازدى، دەپ حابارلايدى «ادىرنا» ءتىلشىسى.
مانەۆرلەر شامامەن ءبىر جارىم اپتاعا سوزىلادى.
جاتتىعۋعا قاتىسۋ ءۇشىن رەينلاند-پفالتس فەدەرالدى جەرىندەگى بيۋحەل اۋە بازاسىنان يتالياداعى اسكەري اۋە بازاسىنا Tornado ۇلگىسىندەگى ءۇش جويعىش ۇشاق جىبەرىلگەن.
ناتو مالىمەتىنشە، بيىلعى وقۋ-جاتتىعۋدىڭ اۋقىمى بىلتىرعى دەڭگەيمەن شامالاس. وعان شامامەن 2 مىڭ اسكەري قىزمەتكەر مەن 70-تەن استام ۇشاق جۇمىلدىرىلعان.
ناتو-نىڭ يادرولىق ساياسات دەپارتامەنتىنىڭ باسشىسى ناسسيما بارروۋزدىڭ ايتۋىنشا، وقۋ-جاتتىعۋدىڭ ماقساتى — اليانستىڭ ءوز اۋماعىن قورعاۋعا دايىن ءارى قابىلەتتى ەكەنىن كورسەتۋ.
ناتو وكىلدەرى مانەۆرلەردىڭ جوسپارعا سايكەس وتكىزىلىپ جاتقانىن جانە قازىرگى وقيعالارعا قاتىسى جوق ەكەنىن اتاپ ءوتتى. جاتتىعۋ بارىسىندا ناقتى يادرولىق قارۋ قولدانىلمايدى، تەك وقۋ-جاتتىعۋعا ارنالعان ماكەتتەر پايدالانىلادى.
ايتا كەتەيىك، وقۋ-جاتتىعۋ 13 قازاننان 23 قازانعا دەيىن جالعاسادى. يتاليا اۋماعىندا مۇنداي مانەۆرلەر جەتىنشى رەت وتكىزىلىپ وتىر.
