استاناداعى №99 مەكتەپتىڭ ديرەكتورى الەۋمەتتىك جەلىدە وقۋشىلاردىڭ گاردەروبتاعى كەپتەلىسى تۇسىرىلگەن بەينە تاراعاننان كەيىن قىزمەتىنەن بوساتىلدى. بۇل تۋرالى قالالىق ءبىلىم باسقارماسى ايتتى، دەپ حابارلايدى «ادىرنا» ءتىلشىسى.
بالالاردىڭ جاپپاي جينالۋىنا ەكىنشى اۋىسىم ساباقتارىنىڭ كەستەسى سەبەپ بولعان. ءبىر مەزەتتە جەتى سىنىپتىڭ ساباعى اياقتالىپ، وقۋشىلار سىرت كيىمدەرىن الۋعا گاردەروبقا بارعان.
اتا-انالاردىڭ ايتۋىنشا، مۇنداي جاعدايلار مەكتەپتە ءجيى قايتالانادى. وتىنىشتەردىڭ بىرىندە وقۋشىلاردىڭ ءبىرى ەسىنەن تانىپ قالعانى ايتىلعان. الايدا تەكسەرۋ بارىسىندا بۇل اقپارات راستالمادى.
«بەينەباقىلاۋ كامەرالارىنداعى جازبالاردى زەردەلەۋ ناتيجەسىندە وقۋشىنىڭ ەسىنەن تانىپ قۇلاعانى تۋرالى اقپارات راستالمادى. مەكتەپ ديرەكتورى اتقارىپ وتىرعان قىزمەتىنەن بوساتىلدى»، – دەپ حابارلادى مەملەكەتتىك ورگان.
وقيعادان كەيىن مەكتەپتە گاردەروب ماڭىنداعى قىزمەتكەرلەردىڭ كەزەكشىلىگى كۇشەيتىلىپ، وقۋشىلاردىڭ قاۋىپسىز قوزعالۋىن قامتاماسىز ەتۋ ءۇشىن قوسىمشا شارالار قابىلدانعان.
