قازاقستان اسكەري-تەڭىز كۇشتەرىنىڭ بۇرىنعى باس قولباسشىسى ۇستالىپ، ۋاقىتشا ۇستاۋ يزولياتورىنا قامالدى. سوت ونىڭ قاماۋعا الىنۋىنا سانكتسيا بەرگەن، دەپ حابارلايدى "ادىرنا" ۇلتتىق پورتالى.
بۇل تۋرالى ىشكى ىستەر مينيسترلىگى حابارلادى.
مينيسترلىكتىڭ مالىمەتىنشە، اسكەري-تەرگەۋ بولىمشەسى كاسپي تەڭىزىندەگى وقۋ-جاتتىعۋ كەزىندە اسكەري قىزمەتشىلەردىڭ قازا بولۋىنا قاتىستى قىلمىستىق ءىستى تەرگەپ جاتىر. تەرگەۋ اياسىندا قىزمەتكە سالعىرت قارادى دەگەن كۇدىكپەن قازاقستان قارۋلى كۇشتەرى اسكەري-تەڭىز كۇشتەرىنىڭ بۇرىنعى باس قولباسشىسى، ءبىرىنشى دارەجەلى كاپيتان ۇستالعان.
«اسكەري-تەرگەۋ بولىمشەسى كاسپي تەڭىزىندەگى وقۋ-جاتتىعۋ كەزىندە اسكەري قىزمەتشىلەردىڭ قازا بولۋىنا قاتىستى قىلمىستىق ءىستى تەرگەۋ بارىسىندا قىزمەتكە سالعىرت قاراعانى ءۇشىن قازاقستان قارۋلى كۇشتەرى اسكەري-تەڭىز كۇشتەرىنىڭ بۇرىنعى باس قولباسشىسىن، ءبىرىنشى دارەجەلى كاپيتاندى ۇستادى جانە ۋاقىتشا ۇستاۋ يزولياتورىنا قامادى»، – دەپ حابارلادى ءىىم.
سوت سانكتسياسىمەن كۇدىكتى قاماۋعا الىندى. قازىر سوتقا دەيىنگى تەرگەۋ جالعاسىپ جاتىر.
ايتا كەتەيىك، اسكەري-تەڭىز كۇشتەرىنىڭ باس قولباسشىسى قىزمەتىن بۇعان دەيىن قانات نيازبەكوۆ اتقارعان. جۋىردا مەملەكەت باسشىسىنىڭ وكىمىمەن ول جانە قورعانىس ءمينيسترىنىڭ ەكى ورىنباسارى قىزمەتتەرىنەن بوساتىلعان.
ەسكە سالايىق، 24 قىركۇيەكتە ماڭعىستاۋ وبلىسىندا اسكەري-تەڭىز كۇشتەرىنىڭ وقۋ-جاتتىعۋى كەزىندە 17 اسكەري قىزمەتشى كاسپي تەڭىزىنە اعىپ كەتكەن. ولاردىڭ ۇشەۋىن قۇتقارۋشىلار امان الىپ قالدى. ال قالعان مارقۇمداردىڭ دەنەسى تابىلىپ، جەرلەۋ ءراسىمى وتكەن.
