جامبىل وبلىسىندا «اۋليەاتا جاستارى» باعدارلاماسى شىلدە ايىندا ىسكە قوسىلماق. جوبا ءوڭىر جاستارىن قولجەتىمدى تۇرعىن ۇيمەن قامتاماسىز ەتۋگە جانە جاس وتباسىلارعا قولداۋ ماقساتىندا دايىندالدى. ونى ازىرلەۋدە وبلىستىڭ ەرەكشەلىكتەرىن ەسكەرە وتىرىپ جانە نۇر-سۇلتان، الماتى قالالارىندا وڭ ناتيجە بەرگەن پيلوتتىق باعدارلامالار نەگىزىندە الىندى. بۇل تۋرالى وكق ءباسپاسوز الاڭىندا وبلىس اكىمىنىڭ ورىنباسارى ۇيسىمباەۆ ەركىن قۇلىمبايۇلى ايتتى.
ونىڭ سوزىنشە، بۇعان دەيىن وبلىستا جاستار مەن جاس وتباسىلاردى تۇرعىن ۇيمەن قامتاماسىز ەتۋگە باعىتتالعان ارنايى باعدارلاما بولماعان.
«جالپى وبلىستا تۇرعىن ءۇي الۋعا كەزەكتە – 7 140, جەر تەلىمىن الۋعا كەزەكتە تۇرعان 10 787 جاس بار. وتكەن جىلى يپوتەكالىق نەسيە راسىمدەگەن جاستار سانى 318-ءدى قۇرادى. باعدارلاماعا جەرگىلىكتى بيۋدجەتتەن 500 ملن تەڭگە ءبولىندى. جاستارعا بەرىلەتىن قارىزدىڭ ەڭ جوعارى سوماسى – 13 ملن تەڭگەگە دەيىن. نەسيە بەرۋ ۋاقىتى – 19 جىل. پايىزدىق مولشەرلەمە – 5%، باستاپقى جارنا – 5%. قامتۋ – 50 ادام»، – دەپ اتاپ ءوتتى سپيكەر.
ەركىن قۇلىمبايۇلى وڭىردە 13 ملن تەڭگەگە دەيىن 1 744 پاتەر بولسا، 1 110 تۇرعىن ءۇيدىڭ بار ەكەندىگى انىقتالعانىن مالىمدەدى. باعدارلاماعا تومەندەگى قىزمەت سالالارىندا جۇمىس ىستەيتىن 35 جاسقا دەيىنگى قر ازاماتى قاتىسادى جانە نەگىزگى قاتىسۋشى رەتىندە تەك ەرلى-زايىپتىلاردىڭ بىرەۋى عانا قاتىسا الادى.
