Jambyl oblysynda «Áýlıeata jastary» baǵdarlamasy shilde aıynda iske qosylmaq. Joba óńir jastaryn qoljetimdi turǵyn úımen qamtamasyz etýge jáne jas otbasylarǵa qoldaý maqsatynda daıyndaldy. Ony ázirleýde oblystyń erekshelikterin eskere otyryp jáne Nur-Sultan, Almaty qalalarynda oń nátıje bergen pılottyq baǵdarlamalar negizinde alyndy. Bul týraly ÓKQ baspasóz alańynda oblys ákiminiń orynbasary Úısimbaev Erkin Qulymbaıuly aıtty.
Onyń sózinshe, buǵan deıin oblysta jastar men jas otbasylardy turǵyn úımen qamtamasyz etýge baǵyttalǵan arnaıy baǵdarlama bolmaǵan.
«Jalpy oblysta turǵyn úı alýǵa kezekte – 7 140, jer telimin alýǵa kezekte turǵan 10 787 jas bar. Ótken jyly ıpotekalyq nesıe rásimdegen jastar sany 318-di qurady. Baǵdarlamaǵa jergilikti bıýdjetten 500 mln teńge bólindi. Jastarǵa beriletin qaryzdyń eń joǵary somasy – 13 mln teńgege deıin. Nesıe berý ýaqyty – 19 jyl. Paıyzdyq mólsherleme – 5%, bastapqy jarna – 5%. Qamtý – 50 adam», – dep atap ótti spıker.
Erkin Qulymbaıuly óńirde 13 mln teńgege deıin 1 744 páter bolsa, 1 110 turǵyn úıdiń bar ekendigi anyqtalǵanyn málimdedi. Baǵdarlamaǵa tómendegi qyzmet salalarynda jumys isteıtin 35 jasqa deıingi QR azamaty qatysady jáne negizgi qatysýshy retinde tek erli-zaıyptylardyń bireýi ǵana qatysa alady.
