Кремль Қазақстан президенті Қасым-Жомарт Тоқаевтың Германия канцлері Фридрих Мерцпен өткен баспасөз мәслихатында Ресей басшысы Владимир Путинге берген бағасын жоғары бағалайды. Бұл туралы Ресей президентінің баспасөз хатшысы Дмитрий Песков мәлімдеді, деп хабарлайды «Адырна» тілшісі РИА Новостиге сілтеме жасап.
«Әрине, біз Қазақстан президентінің Владимир Путинге берген бағасын жоғары бағалаймыз және оған ризашылығымызды білдіреміз. Қазақстанмен арадағы қарым-қатынасымызды, екіжақты байланыстарымызды ерекше қадірлейміз», – деді Песков журналистерге.
ТАСС агенттігінің хабарлауынша, Песков екі ел президентінің жеке қарым-қатынасы жақын, сындарлы әрі сенімге негізделгенін айтты. Оның сөзінше, бұл олардың халықаралық күн тәртібіндегі ең күрделі мәселелерді, соның ішінде Украинадағы жағдайды реттеу мәселелерін де ашық талқылауына мүмкіндік береді.
Бұған дейін Қасым-Жомарт Тоқаев Фридрих Мерцпен өткен баспасөз мәслихатында Владимир Путинді Қазақстан, Орталық Азия, Еуропа және әлем үшін ең қолайлы саяси тұлғалардың бірі деп санайтынын айтқан болатын. Тоқаев Ресей президентінің «күрделі тарихы бар ірі мемлекетті басқаруға қажетті қасиеттерге ие екенін, сондай-ақ өз елі алдындағы стратегиялық мақсаттарды терең түсінетінін» атап өтті.
Сол баспасөз мәслихатында мемлекет басшысы Украина аумағындағы қақтығысты тоқтатып, дипломатиялық немесе өзге де келіссөздер үдерісіне көшу қажеттігін тағы да көтерді.
Осыған ұқсас мәлімдемені Тоқаев биыл шілде айында Омбы қаласында Владимир Путинмен кездесуі кезінде де жасаған еді. Бұған жауап ретінде Ресей президенті әскери операцияның барысы туралы жан-жақты ақпарат берген. Кейін Дмитрий Песков Киевтің ұстанымын ескере отырып, «қақтығысты тоқтатып қою қазіргі жағдайда мүмкін емес» екенін мәлімдеген.
