بىرىككەن اراب امىرلىكتەرىندە ء(باا) نوسەر جاۋىن سالدارىنان بىرنەشە قالانى سۋ باستى، دەپ حابارلايدى "ادىرنا" ۇلتتىق پورتالى.
ەل بيلىگى تۇرعىندارعا ۇيدە قالۋعا، سۋ باسقان ايماقتارعا بارماۋعا جانە ساياحاتتى شەكتەۋگە شاقىردى.
ءباا ۇلتتىق مەتەورولوگيا ورتالىعى ەلدە اۋا رايىنىڭ قۇبىلمالى بولاتىنىن، نوسەر جاڭبىر جاۋىپ، جەل ەكپىنى كۇشەيەتىنىن ەسكەرتتى. جاڭبىردىڭ ەڭ كوپ مولشەرى راس-ەل-حايمادا – 127 مم، پورت ساكردا – 123 مم، ال تاۋلى ايماقتارداعى دجابال-ار-راحبا مەن دجابال-دجەيستە سايكەسىنشە 117,5 مم جانە 166,6 مم جەتكەن.
Gulf News مالىمەتىنشە، شاردجا پوليتسياسى سۋ تاسقىنىنان كەيىن ونەركاسىپتىك ايماقتا ەكى ادامنىڭ ەلەكتر توعىنان قازا تاپقانىن تەرگەپ جاتىر.
ەلدىڭ ءىرى قالالارىنىڭ ءبىرى دۋباي دا سۋ استىندا قالدى. قاۋىپسىزدىك ماقساتىندا بيلىك قالاداعى ساياباقتار مەن قوعامدىق جاعاجايلاردى ۋاقىتشا جاۋىپ تاستادى.
