جامبىل وبلىسىندا بيىل سۋبسيدياعا بولىنگەن قارجى كولەمى 50 پايىزعا ارتتى

1472
Adyrna.kz Telegram

بۇقارالىق اقپارات قۇرالدارى وكىلدەرىمەن وتكەن كەزدەسۋدە جامبىل وبلىسىنىڭ اكىمى ايماقتا بيىل سۋبسيدياعا 31,2 ملرد. تەڭگە بولىنگەنىن جەتكىزدى. بۇل كورسەتكىش وتكەن جىلمەن سالىستىرعان 50 پايىزعا ارتقان.

- اتالعان قولداۋ شارالارىمەن ءاربىر اۋىل، ءاربىر كاسىپكەر، شارۋلار قامتىلۋى ءتيىس. بۇل جۇمىستاردى ناتيجەلى ىسكە اسىرۋ – اۋدان، اۋىل اكىمدەرىنىڭ نەگىزگى مىندەتى،-دەپ اتاپ ءوتتى نۇرجان نۇرجىگىتوۆ.

جالپى، 2021 جىلى وبلىستىڭ اۋىلشارۋاشىلىعى سالاسىن قولداۋعا بارلىق كوزدەردەن 36,3 ملرد. تەڭگە، ونىڭ ىشىندە 19,4 ملرد. تەڭگە سۋبسيديا قارالعان بولسا، بيىل بۇل ماقساتقا 60 ملرد. تەڭگە ءبولىنىپ وتىر.

سونداي-اق، ايماق باسشىسى 2019 جىلى باستاۋ العان اۋىل تۇرعىندارىنىڭ تۇرمىستىق تابىسىن جاقسارتۋ باعىتىنداعى پيلوتتىق جوبا ءوزىنىڭ جالعاسىن تاباتىنىن ايتتى.

- ءبىر اي بۇرىن وبلىسقا ارنايى كەلگەن ۇكىمەتتىك دەلەگاتسيا جوبانىڭ تيىمدىلىگىنە كوز جەتكىزىپ، بۇل تاجىريبەنى ەل كولەمىندە تاراتۋ ءىسىن قولعا الۋدا.
وزدەرىڭىزگە بەلگىلى، جوبانىڭ ءبىرىنشى كەزەڭىندە وڭىردەگى 11 اۋىلدىق وكرۋگكە قاراستى 25 ەلدى مەكەندەگى 7 856 وتباسى قامتىلدى. ايتارلىقتاي ناتيجەگە قول جەتكىزدىك. بۇل ماقساتتا جالپى 9,2 ملرد. تەڭگە نەسيە قاراجاتى باعىتتالدى.
2021 جىلى قايتارىلعان نەسيەلەر ەسەبىنەن قوسىمشا 3 اۋىلدىق وكرۋگتە جوبا جالعاسىن تاپتى.

پيلوتتىق جوبامەن وڭىردەگى قالعان 139 اۋىلدىق وكرۋگتەردى قامتۋعا قاجەتتى قارجى كولەمى 75,5 ملرد. تەڭگەنى قۇراپ وتىر. ۇسىنىسىمىز ۇكىمەتتەن قولداۋ تاپتى.

بىزدە بۇل جوبانى ارى قاراي ناتيجەلى جۇزەگە اسىرۋ ءۇشىن ءتيىستى كادرلار دا، تاجىريبە دە جەتكىلىكتى،-دەدى وبلىس اكىمى.

ايتا كەتەيىك، اعىمداعى جىلى پيلوتتىق جوبا اياسىنداعى جەڭىلدىكتەرمەن قامتۋ ءۇشىن وبلىستىڭ تاعى 10 اۋىلدىق وكرۋگى ايقىندالىپ وتىر. بۇل باعىتقا 6,4 ملرد. تەڭگە قارجى قاجەت. قازىرگى تاڭدا جوبانىڭ بەس باعىتى بويىنشا اۋىلدىق وكرۋگتەردىڭ جوبا-ەسەپتەرى ناقتىلانۋدا.

پىكىرلەر