بۇعان دەيىن قوس پالاتالى پارلامەنتتە ءماجىلىس توراعاسى بولعان ەرلان قوشانوۆ قازاقستان حالىق كەڭەسىنىڭ توراعاسى بولىپ سايلاندى, دەپ حابارلايدى «ادىرنا» ءتىلشىسى.
توراعانى سايلاۋ ءراسىمى 23 قىركۇيەكتە استانادا وتكەن قازاقستان حالىق كەڭەسىنىڭ ۇيىمداستىرۋ وتىرىسىندا ءوتتى. ەسەپ كوميسسياسىنىڭ توراعاسى مۇرات ابەنوۆ جاسىرىن داۋىس بەرۋدىڭ ناتيجەلەرىن جاريالادى.
داۋىس بەرۋ جاشىگىنەن 121 بيۋللەتەن شىعارىلدى. جارامسىز دەپ تانىلعان بيۋللەتەن بولعان جوق. ەرلان قوشانوۆتىڭ كانديداتۋراسىن 120 ادام قولداپ داۋىس بەرسە، ءبىر ادام قالىس قالعان.
ەرلان قوشانوۆتىڭ كانديداتۋراسىن بۇعان دەيىن قازاقستان پرەزيدەنتى قاسىم-جومارت توقاەۆ ۇسىنعان بولاتىن.
ەرلان جاقانۇلى قوشانوۆ 1962 جىلعى 14 تامىزدا جەزقازعان وبلىسى اقسۋ-ايۋلى اۋىلىندا دۇنيەگە كەلگەن. 1984 جىلى جەزقازعانداعى قاراعاندى پوليتەحنيكالىق ينستيتۋتىنىڭ فيليالىن "ينجەنەر-مەحانيك" ماماندىعى بويىنشا تامامداعان. كەيىن جوعارى كوممەرتسيالىق ءبىلىم الىپ، 1999 جىلى قازاق مەملەكەتتىك باسقارۋ اكادەمياسىندا "ەكونوميست" ماماندىعىن مەڭگەرگەن. ەڭبەك جولىن 1986 جىلى "جەزقازعانتۇستىمەت" بايىتۋ فابريكاسىندا سلەسار بولىپ باستاعان. كەيىن كومسومول ۇيىمدارىندا جانە سىرتقى ەكونوميكالىق بايلانىس سالاسىندا قىزمەت اتقارعان.
1995-1999 جىلدارى سەنات دەپۋتاتى بولدى. كەيىن ۇكىمەتتىڭ پارلامەنتتەگى وكىلى، پرەمەر-مينيستر كەڭسەسى باسشىسىنىڭ ورىنباسارى جانە كولىك جانە كوممۋنيكاتسيالار ۆيتسە-ءمينيسترى قىزمەتتەرىن اتقارعان.
2007-2017 جىلدارى پرەمەر-مينيستر كەڭسەسى باسشىسىنىڭ ورىنباسارى جانە كەيىن كەڭسە باسشىسى بولعان. 2017–2019 جىلدارى قاراعاندى وبلىسىنىڭ اكىمى، ال 2019–2022 جىلدارى پرەزيدەنت اكىمشىلىگىنىڭ باسشىسى قىزمەتىن اتقاردى.
2022 جىلعى اقپاندا ءماجىلىس توراعاسى بولىپ سايلانعان. 2023 جىلى VIII شاقىرىلىمداعى ءماجىلىس توراعاسى بولىپ قايتا سايلاندى. 2022–2026 جىلدارى "Amanat" پارتياسىن باسقارعان.
