اققايىڭ اۋىلى – قىزىلسۋات اۋىلدىق وكرۋگىنە قارايتىن شاعىن ەلدى مەكەن. «ادىرنا» YouTube ارناسىنىڭ ارنايى ۆيدەوسىندا اۋىلدىڭ بۇگىنگى تىنىسى، تۇرعىنداردى تولعاندىراتىن ماسەلەلەر، ەلدى مەكەننىڭ الداعى دامۋ جوسپارى جانە اۋىل ماڭىنداعى ORMAN PARK دەمالىس كەشەنى تانىستىرىلدى.
سۇحباتتا قىزىلسۋات اۋىلدىق وكرۋگىنىڭ اكىمى ورازباي قۇباشۇلى اققايىڭ اۋىلىنىڭ قازىرگى جاعدايى تۋرالى ايتىپ بەرەدى.
اكىمنىڭ مالىمەتىنشە، اۋىلدا بۇگىندە نەبارى 368 ادام تۇرادى. شاعىن ەلدى مەكەننىڭ وزىندىك تىنىس-تىرشىلىگى قالىپتاسقانىمەن، حالىق سانىنىڭ ازدىعى مەن اۋىل ينفراقۇرىلىمىن دامىتۋ ماسەلەلەرى وزەكتى بولىپ وتىر.
سۇحبات بارىسىندا اۋىلدىڭ الداعى بەس جىلدا قانداي وزگەرىستەرگە ۇشىراۋى مۇمكىن ەكەنى دە ءسوز بولادى. سونىمەن قاتار تۇرعىنداردى الاڭداتاتىن نەگىزگى ماسەلەلەر مەن ەلدى مەكەندى دامىتۋ باعىتتارى تالقىلانادى.
ۆيدەوداعى كەلەسى نىسان — اققايىڭ اۋىلى ماڭىنداعى ORMAN PARK دەمالىس كەشەنى.
تابيعات اياسىندا ورنالاسقان دەمالىس ورنى وتباسىمەن ۋاقىت وتكىزۋگە ارنالعان. كەشەندە قوناقتارعا ءتۇرلى فورماتتاعى دەمالىس ۇيىمداستىرۋعا مۇمكىندىك بار.
سولاردىڭ ءبىرى — 14 مەترلىك باسسەين. اشىق اسپان استىنداعى باسسەين اسىرەسە جاز مەزگىلىندە دەمالۋشىلار ءۇشىن نەگىزگى ورىنداردىڭ بىرىنە اينالادى.
ORMAN PARK اۋماعىندا قوناقتارعا ارنالعان A-frame ۇيلەرى دە بار. قازىرگى تاڭدا تابيعات اياسىنداعى وسىنداي شاعىن ۇيلەر وتباسىمەن نەمەسە جاقىندارىمەن دەمالۋدى قالايتىن ادامدار اراسىندا سۇرانىسقا يە.
كەشەندە جۇبايلارعا ارنالعان ارنايى اكتسيالار دا قاراستىرىلعان. بۇل دەمالىس ورنىن تەك ۇلكەن كومپانيالار ءۇشىن ەمەس، ەكى ادامعا ارنالعان تىنىش دەمالىسقا دا بەيىمدەۋگە مۇمكىندىك بەرەدى.
دەمالىس ورنىنىڭ تاعى ءبىر ەرەكشەلىگى — كيىز ءۇي. ۇلتتىق ناقىشتاعى بۇل ورىن قوناقتارعا ءداستۇرلى اتموسفەرادا باس قوسۋعا مۇمكىندىك بەرەدى.
ۆيدەودا دەمالىس ورنىنا كەلەتىن قوناقتار، نىسانداردى جالعا الۋ ءتارتىبى جانە ولاردىڭ قۇنى تۋرالى دا ءسوز قوزعالادى. وسىلايشا كورەرمەندەر ORMAN PARK-تا دەمالىستى الدىن الا جوسپارلاۋ ءۇشىن قاجەتتى اقپاراتپەن تانىسا الادى.
