15 قىركۇيەكتە «ادىلەت» پارتياسىنىڭ باسشىلىق قۇرامى ايقىندالدى. پارتيا توراعاسىنىڭ بۇيرىعىمەن اسحات ورالوۆ، نۇرسۇلتان بايتىلەسوۆ جانە ەلدار جۇماعازيەۆ توراعا ورىنباسارلارى لاۋازىمدارىنا تاعايىندالدى، دەپ حابارلايدى «ادىرنا» ءتىلشىسى.
اسحات ورالوۆ باقىلاۋ، تالداۋ جانە قىزمەتتى باعالاۋ ماسەلەلەرىنە جەتەكشىلىك ەتەدى. ول ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن جانە رەسەي فەدەراتسياسى سىرتقى ىستەر مينيسترلىگىنىڭ ماسكەۋ مەملەكەتتىك حالىقارالىق قاتىناستار ينستيتۋتىن تامامداعان، فيلوسوفيا دوكتورى عىلىمي دارەجەسىنە يە. ونىڭ جاستار ساياساتى سالاسىنداعى، مەملەكەتتىك ورگاندار مەن پارتيالىق قۇرىلىمدارداعى باسشىلىق قىزمەتتەردە جيعان مول كاسىبي تاجىريبەسى بار. ءار جىلدارى پاۆلودار وبلىسى اكىمىنىڭ ورىنباسارى، اقپارات جانە قوعامدىق دامۋ ۆيتسە-ءمينيسترى، استانا قالاسى اكىمىنىڭ ورىنباسارى، قر مادەنيەت جانە سپورت ءمينيسترى، پرەزيدەنت اكىمشىلىگىندە مەملەكەتتىك ينسپەكتور قىزمەتتەرىن اتقاردى. تاعايىنداۋعا دەيىن ماڭعىستاۋ وبلىسى اكىمىنىڭ ءبىرىنشى ورىنباسارى لاۋازىمىندا جۇمىس ىستەدى.
نۇرسۇلتان بايتىلەسوۆ قۇقىقتىق جانە زاڭنامالىق باعىتقا جەتەكشىلىك ەتەدى. ونىڭ كاسىبي قىزمەتى سوت جۇيەسىمەن تىعىز بايلانىستى. ول اۋداندىق سوت مامانىنان باستاپ، قازاقستان رەسپۋبليكاسى سوت اكىمشىلىگى باسشىسىنىڭ ءبىرىنشى ورىنباسارىنا دەيىنگى قىزمەت جولىنان ءوتتى. سونداي-اق پارلامەنت ءماجىلىسىنىڭ VIII شاقىرىلىم دەپۋتاتى بولدى. ءار جىلدارى م. اۋەزوۆ اتىنداعى وڭتۇستىك قازاقستان ۋنيۆەرسيتەتىندە جانە وڭىرلىك الەۋمەتتىك-يننوۆاتسيالىق ۋنيۆەرسيتەتتە «قۇقىقتانۋ»، «ەكونوميكا» جانە «بيزنەس» ماماندىقتارى بويىنشا ءبىلىم الدى.
ەلدار جۇماعازيەۆ ەكونوميكا، سالالىق جانە وڭىرلىك دامۋ ماسەلەلەرىنە جاۋاپ بەرەدى. ول اتىراۋ مۇناي جانە گاز ينستيتۋتىن، سونداي-اق رەسەي فەدەراتسياسى پرەزيدەنتىنىڭ جانىنداعى رەسەي مەملەكەتتىك قىزمەت اكادەمياسىن ءتامامدادى. ءار جىلدارى اتىراۋ وبلىسىنداعى ىشكى ساياسات سالاسىندا قىزمەت ەتىپ، «اتىراۋ-اقپارات» كمك وڭىرلىك مەدياحولدينگىن باسقارعان، «اتامەكەن» ۇلتتىق كاسىپكەرلەر پالاتاسىندا باسشىلىق قىزمەتتەردە جۇمىس ىستەدى. پارتيالىق جۇمىستا مول تاجىريبەسى بار.
بۇعان دەيىن پارتيا توراعاسىنىڭ ورىنباسارلارى لاۋازىمدارىنا كوممۋنيكاتسيا ماسەلەلەرى جونىندە – ءاليا ادامباەۆا، يدەولوگيا باعىتى بويىنشا – ەرجان جىلقىباەۆ جانە تسيفرلاندىرۋ ماسەلەلەرى جونىندە – قانىش تولەۋشين تاعايىندالعان ەدى.
مادەنيەت جانە سپورت ءمينيسترى اسحات ورالوۆ بولعالى فۋتبولشىلارىمىز جەڭىپ جاتىر دەپتى ءبىر جاعىمپاز).
