بيىل وتباسى كۇنى اياسىندا ەلىمىزدىڭ بارلىق وڭىرىندە 12 مىڭعا جۋىق ادامدى قامتىعان مىڭنان استام ءىس-شارا وتكىزىلدى. وتباسىلىق جانە ۇلتتىق قۇندىلىقتاردى دارىپتەۋگە، اتا-انالاردىڭ بالا تاربيەسىنە قاتىستى ءبىلىمى مەن داعدىسىن ارتتىرۋعا، بالالار مەن جاستاردىڭ دەنساۋلىعىن نىعايتۋعا، سونداي-اق تۇرمىستىق زورلىق-زومبىلىقتىڭ الدىن الۋعا باعىتتالعان تاقىرىپتىق اكتسيالار، كەزدەسۋلەر، سەمينارلار مەن اعارتۋشىلىق ءىس-شارالار ۇيىمداستىرىلدى.
وتباسى ينستيتۋتىن نىعايتۋ – پرەزيدەنت قاسىم-جومارت توقاەۆتىڭ ايرىقشا نازارىنداعى مەملەكەتتىك ساياساتتىڭ باسىم باعىتتارىنىڭ ءبىرى. بۇل رەتتە قازاقستان رەسپۋبليكاسىنىڭ جاڭا كونستيتۋتسياسىنىڭ ماڭىزى ەرەكشە. وندا نەكە زاڭدا بەلگىلەنگەن تارتىپپەن مەملەكەت تىركەگەن ەر مەن ايەلدىڭ ەرىكتى ءارى تەڭ قۇقىقتى وداعى رەتىندە ايقىندالعان.
سونىمەن قاتار 2024 جىلى ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى قازاقستان رەسپۋبليكاسىنىڭ زاڭى قابىلداندى. قۇجاتقا سايكەس تۇرمىستىق زورلىق-زومبىلىق ءۇشىن قىلمىستىق جاۋاپكەرشىلىك ەنگىزىلىپ، بالالارعا قاتىستى زورلىق-زومبىلىقتىڭ بارلىق ءتۇرى ءۇشىن جاۋاپكەرشىلىك كۇشەيتىلدى.
وسى زاڭنامالىق نورمالاردى ىسكە اسىرۋ اياسىندا تۇرمىستىق زورلىق-زومبىلىقتىڭ الدىن الۋعا، وتباسى ينستيتۋتىن نىعايتۋعا جانە كامەلەتكە تولماعانداردىڭ قاۋىپسىزدىگىن قامتاماسىز ەتۋگە ارنالعان كەشەندى شارالار ازىرلەندى.
وتباسىلارعا كورسەتىلەتىن اتاۋلى كومەكتى كۇشەيتۋ ماقساتىندا وتباسىن قولداۋ ورتالىقتارىنىڭ جۇمىسى جاڭعىرتىلدى. قازىر ەلىمىزدە وسىنداي 160 ورتالىق جۇمىس ىستەيدى. الداعى ۋاقىتتا ولاردىڭ سانىن 208-گە جەتكىزىپ، قازاقستاننىڭ ءاربىر اۋدانى مەن قالاسىندا اشۋ جوسپارلانىپ وتىر.
2026 جىلدىڭ باسىنان بەرى وتباسىن قولداۋ ورتالىقتارىنا 50 مىڭنان استام ازامات جۇگىندى. 43 مىڭنان استام وتباسىنا كونسۋلتاتسيالىق كومەك كورسەتىلىپ، 6 مىڭعا جۋىق وتباسى ۇزاق مەرزىمدى الەۋمەتتىك سۇيەمەلدەۋگە الىندى.
بۇل ورتالىقتار وتباسىلارعا كەشەندى كومەك كورسەتىپ كەلەدى. سونداي-اق ولار الەۋمەتتىك قاتەرلەردىڭ الدىن الۋعا ىقپال ەتىپ، قيىن ومىرلىك جاعدايعا تاپ بولعان ازاماتتارعا قولداۋ بىلدىرەدى.
بۇدان بولەك، وتباسى جانە نەكە ينستيتۋتىن ساقتاۋ مەن نىعايتۋ جونىندەگى 2025-2027 جىلدارعا ارنالعان ءىس-شارالار جوسپارى ازىرلەنىپ، قابىلداندى. قۇجات اجىراسۋدىڭ الدىن الۋعا، ازاماتتاردىڭ وتباسىلىق ومىرگە سانالى تۇردە دايىندالۋىنا جانە جاۋاپتى اتا-انا مادەنيەتىن قالىپتاستىرۋعا باعىتتالعان.
قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلىپ جاتقان «اتا-انالار اكادەمياسى» جوباسى دا جالعاسىپ كەلەدى. ونىڭ ماقساتى – وتباسى ينستيتۋتىن نىعايتۋ، اتا-انالاردىڭ بالا تاربيەسىنە قاتىستى ءبىلىمى مەن داعدىسىن ارتتىرۋ جانە جاۋاپتى تاربيە مادەنيەتىن قالىپتاستىرۋ.
2026 جىلى جوبا اياسىندا ەلىمىز بويىنشا 40 مىڭنان استام ادامدى قامتۋ جوسپارلانعان. ولاردىڭ قاتارىندا اتا-انالار، پەداگوگتەر جانە الەۋمەتتىك سالا ماماندارى بار.
مەملەكەتتىك وتباسى ساياساتى اياسىندا ەڭبەك پەن وتباسىلىق مىندەتتەردى قاتار الىپ جۇرۋگە قولايلى جاعداي جاساۋ شارالارى دا جۇيەلى تۇردە جۇزەگە اسىرىلىپ كەلەدى.
ماسەلەن، مادەنيەت جانە اقپارات مينيسترلىگى بۇۇ-نىڭ حالىقتىڭ قونىستانۋى سالاسىنداعى قورىمەن بىرلەسىپ، «وتباسىنا قولايلى جۇمىس ورنى» جوباسىن جۇزەگە اسىرىپ كەلەدى. باستاما قىزمەتكەرلەردىڭ وتباسىلىق جاعدايى مەن مىندەتتەرى ەسكەرىلەتىن كورپوراتيۆتىك مادەنيەتتى دامىتۋعا جانە جۇمىس ىستەيتىن اتا-انالاردى قولداۋعا باعىتتالعان.
2026 جىلى مەملەكەتتىك ورگاندار مەن جۇمىس بەرۋشىلەردىڭ وكىلدەرىنە ارنالعان وقىتۋ باعدارلاماسى ىسكە قوسىلدى. باعدارلاما ۇيىمداردا وتباسىلىق مىندەتتەردى ەسكەرەتىن جۇمىس تاسىلدەرىن ەنگىزۋدى كوزدەيدى.
بۇل شارالار وتباسىنداعى بىرلىك پەن قولداۋدى كۇشەيتىپ، ونىڭ قاۋىپسىزدىگى مەن ءال-اۋقاتىنا قامقورلىق جاساۋدا مەملەكەت پەن قوعامنىڭ ورتاق جاۋاپكەرشىلىگىن ارتتىرۋدى كوزدەيدى.
