بۇرىنعى ءماجىلىس دەپۋتاتى باقىتجان بازاربەك ءوزى قاتىسقان جول-كولىك وقيعاسىندا زارداپ شەككەن نۇرجىگىت قوشانوۆتىڭ دارىگەرلەرىمەن بىرگە تۇسكەن فوتوسىن جاريالادى، دەپ حابارلايدى "ادىرنا" ۇلتتىق پورتالى.
ول تاراز قالاسىنىڭ كوپبەيىندى اۋرۋحاناسى ماماندارىنا العىس ايتتى.
بازاربەكتىڭ ايتۋىنشا، بۇل – نۇرجىگىتتىڭ اماندىعىن كۇتكەن كوپشىلىك اسىعا كۇتكەن سۋرەت. ول دارىگەرلەردىڭ كاسىبي ءبىلىمى مەن ەڭبەگىنىڭ ارقاسىندا ازاماتتىڭ ءومىرى ساقتالىپ، ەسىن جيىپ، قايتا اياققا تۇرعانىن اتاپ ءوتتى.
«نۇرجىگىتتى تۇرعىزعان دارىگەرلەر! بۇل – ەلىمىزدىڭ مىڭداعان ادامى اسىعا كۇتكەن سۋرەت»، – دەپ جازدى ەكس-دەپۋتات.
ول تاراز قالاسىنىڭ كوپبەيىندى اۋرۋحاناسى رەانيماتسيا بولىمشەسىنىڭ ماماندارىن جوعارى باعالاپ، ولاردى جامبىل وبلىسى مەديتسيناسىنىڭ ۇزدىكتەرى قاتارىندا اتادى.
باقىتجان بازاربەك دارىگەرلەرگە العىس ايتىپ، ولاردىڭ كۇن سايىن ناۋقاستاردىڭ ءومىرىن ساقتاپ، دەنساۋلىعىن قالپىنا كەلتىرۋگە ۇلەس قوسىپ جۇرگەنىن اتاپ ءوتتى.
