«كسەلل» اق (Kcell جانە activ برەندتەرى) 2026 جىلعى جازعى ماۋسىمدا قازاقستاننىڭ تانىمال تۋريستىك باعىتتارىنداعى جەلى جۇمىسىنىڭ ناتيجەلەرىن قورىتىندىلادى.
ماۋسىم الدىندا جانە ونىڭ بارىسىندا كومپانيا كۋرورتتىق ايماقتاردا، اۆتوجولدار بويىندا جانە جاز مەزگىلىندە ۇيالى جەلىگە تۇسەتىن جۇكتەمە كۇرت ارتاتىن ورىنداردا 4G مەن 5G جەلىلەرىن كۇشەيتتى.
ەلدەگى تۋريزم سالاسى ءوسىپ كەلەدى. ۇلتتىق ستاتيستيكا بيۋروسىنىڭ مالىمەتىنشە، 2026 جىلدىڭ العاشقى جارتىسىندا قازاقستانداعى قوناقۇيلەر، دەمالىس بازالارى جانە باسقا دا تۋريستىك نىساندار قىزمەتىن 4,77 ميلليون ادام پايدالانعان.
ۇيالى جەلى ءۇشىن تۋريستىك باعىتتاردىڭ باستى ەرەكشەلىگى – جىل ىشىندە جۇكتەمەنىڭ كۇرت وزگەرۋى. ادەتتە بىرنەشە مىڭ ادام بولاتىن ورىنداردا ماۋسىم قىزعان شاقتا پايدالانۋشىلار سانى بىرنەشە ەسە ارتادى. سوعان سايكەس ۇيالى ينتەرنەت تۇتىنۋ كولەمى دە ۇلعايادى: تۋريستەر ناۆيگاتسيانى، مەسسەندجەرلەر مەن الەۋمەتتىك جەلىلەردى پايدالانادى، فوتو جانە بەينەماتەريالدار جۇكتەيدى، بەينەقوڭىراۋ شالادى ءارى ينتەرنەتتى باسقا قۇرىلعىلارعا تاراتادى.
سوندىقتان تۋريستىك ماۋسىمعا دايىندىق بارىسىندا Kcell قامتۋ اۋماعىن كەڭەيتىپ قانا قويماي، جۇكتەمە ارتاتىن ورىنداردا جەلىنىڭ وتكىزۋ قابىلەتىن دە ارتتىرادى.
سولتۇستىك
ەلدەگى ەڭ تانىمال تۋريستىك باعىتتاردىڭ ءبىرى – ششۋچينسك-بۋراباي كۋرورتتىق ايماعى. ۇلتتىق ستاتيستيكا بيۋروسىنىڭ دەرەگىنە سايكەس، 2026 جىلدىڭ العاشقى توقسانىندا عانا بۇل وڭىرگە 116,7 مىڭ ادام بارعان.
ششۋچينسك قالاسىندا 700 مگتس دياپازونىندا جۇمىس ىستەيتىن 5G تەحنولوگياسىنداعى ەكى بازالىق ستانتسيا قىزمەت كورسەتەدى. تومەن جيىلىك سيگنالدىڭ كەڭ اۋماققا تارالۋىنا مۇمكىندىك بەرەدى. بۇل اسىرەسە كۋرورتتىق ايماقتار مەن قالادان تىس اۋماقتار ءۇشىن ماڭىزدى.
كومپانيا ەلىمىزدىڭ سولتۇستىگىندەگى نەگىزگى تۋريستىك باعىتتاردىڭ ءبىرى – استانا مەن بۋراباي اراسىنداعى جولداعى بايلانىس ساپاسىن دا جاقسارتىپ جاتىر. 2026 جىلدىڭ قازان ايىنىڭ سوڭىنا دەيىن بۇل باعىتتا 4G قامتۋىن كەڭەيتۋدىڭ كەزەكتى جۇمىستارى جۇزەگە اسىرىلادى.
وڭتۇستىك جانە تاۋلى وڭىرلەر
ەلىمىزدەگى تۋريستىك ايماقتاردىڭ ىشىندە ەڭ ۇلكەن بولىگى الماتى تاۋ كلاستەرىنە تيەسىلى. ۇلتتىق ستاتيستيكا بيۋروسىنىڭ مالىمەتىنشە، 2026 جىلدىڭ ءبىرىنشى توقسانىندا 509,3 مىڭ ادام بارعان.
بۇگىندە Kcell جانە activ-ءتىڭ 5G جەلىسى مەدەۋ مەن شىمبۇلاقتا قولجەتىمدى. بايلانىس تەڭىز دەڭگەيىنەن 3 مىڭ مەتردەن استام بيىكتىكتە دە جۇمىس ىستەيدى. ماسەلەن، شىمبۇلاق تاۋ شاڭعىسى كۋرورتىنىڭ ەڭ جوعارعى نۇكتەسى شامامەن 3180 مەتر بيىكتىكتە ورنالاسقان.
وي-قاراعايدا ءۇش بايلانىس نىسانى جۇمىس ىستەيدى: ولاردىڭ بىرەۋى 5G, ەكەۋى 4G تەحنولوگياسىن قولدايدى. سونداي-اق 4G جەلىسى اقبۇلاقتا، تۇرگەندە جانە بۋتاكوۆكادا قولجەتىمدى.
Kcell جانە activ-ءتىڭ 4G جەلىسى كولساي كولدەرى اۋماعىندا جانە ساتى اۋىلىندا دا جۇمىس ىستەيدى. بۇل بايلانىس ينفراقۇرىلىمىن دامىتۋ تۇرعىسىنان كۇردەلى وڭىرلەردىڭ ءبىرى، ويتكەنى كولساي كولدەرى جۇيەسى تەڭىز دەڭگەيىنەن 2850 مەترگە دەيىنگى بيىكتىكتە ورنالاسقان.
5G جەلىسى قوناەۆ قالاسى مەن قاپشاعاي سۋ قويماسىنىڭ جاعالاۋىندا دا قولجەتىمدى. سونداي-اق قازاقستاننىڭ وڭتۇستىگىندەگى باستى تۋريستىك ورتالىقتاردىڭ ءبىرى تۇركىستاندا دا جوعارى جىلدامدىقتى 5G قىزمەتى جۇمىس ىستەپ تۇر.
كەلەسى كەزەڭدە كومپانيا الماتى – قوناەۆ جانە الماتى – شارىن – كولساي باعىتتارىنداعى بايلانىستى ودان ءارى كۇشەيتۋدى جوسپارلاپ وتىر.
الايدا شالعاي تۋريستىك ورىنداردا ساپالى بايلانىستى قامتاماسىز ەتۋ ءۇشىن تەك تەلەكوممۋنيكاتسيالىق جابدىق ورناتۋ جەتكىلىكسىز. مىسالى، قايىڭدى كولى ماڭىندا جاڭا بايلانىس نىسانىن سالۋ ءۇشىن جەر تەلىمىن انىقتاپ، ەلەكتر قۋاتىمەن قامتاماسىز ەتۋ جانە دەرەكتەردى تاسىمالداۋ جەلىسىنە قوسۋ قاجەت. مۇنداي جوبالاردى جۇزەگە اسىرۋ ءۇشىن وپەراتوردىڭ، جەرگىلىكتى اتقارۋشى ورگانداردىڭ جانە ينفراقۇرىلىمدىق ۇيىمداردىڭ بىرلەسكەن جۇمىسى كەرەك. ەلەكتر قۋاتى، دايىن الاڭ نەمەسە قاجەتتى ينفراقۇرىلىم بولماعان جاعدايدا بازالىق ستانتسيانى تەك وپەراتوردىڭ كۇشىمەن سالۋ مۇمكىن ەمەس.
قايىڭدى كولى ماڭىنداعى بايلانىس جەلىسىن دامىتۋ جوباسى جول كارتاسىنا ەنگىزىلگەن جانە ينۆەستورمەن بىرلەسىپ جۇزەگە اسىرىلادى.
باتىس
ەلدىڭ باتىسىندا وپەراتور كاسپي تەڭىزى جاعالاۋىندا جانە ماڭعىستاۋ وبلىسىنىڭ نەگىزگى تۋريستىك باعىتتارىندا جەلىنى دامىتىپ كەلەدى. ۇلتتىق ستاتيستيكا بيۋروسىنىڭ مالىمەتىنشە، 2026 جىلدىڭ ءبىرىنشى توقسانىندا ماڭعىستاۋ كۋرورتتىق ايماعىنا 53,3 مىڭ ادام كەلگەن. اقتاۋدا Kcell جانە activ-ءتىڭ 5G جەلىسى جۇمىس ىستەيدى. ال كەندىرلى مەن فورت-شەۆچەنكودا ابونەنتتەرگە 4G قولجەتىمدى. اقتاۋ – كەندىرلى باعىتىندا كومپانيا تۋريستىك اعىننىڭ ءوسۋى مەن كۋرورتتىق ايماقتىڭ ءارى قاراي دامۋىن ەسكەرە وتىرىپ، قولدانىستاعى بايلانىس نىساندارىنىڭ مۇمكىندىكتەرىن كەڭەيتۋدى جالعاستىرىپ جاتىر.
شىعىس
جازعى ماۋسىمداعى ەڭ بەلسەندى باعىتتاردىڭ ءبىرى – الاكول. قازىرگى تاڭدا Kcell جانە activ-ءتىڭ 4G جەلىسى اقشي، قابانباي جانە جاربۇلاق اۋىلدارىندا قولجەتىمدى. ماۋسىم بارىسىندا كومپانيا ءوسىپ كەلە جاتقان جۇكتەمەنى ەسكەرە وتىرىپ، قولدانىستاعى جەلىنى وڭتايلاندىرىپ، كۇشەيتۋ جۇمىستارىن جۇرگىزدى. كەلەسى كەزەڭدە كوكتۇما اۋماعىنداعى قامتۋ ايماعىن كەڭەيتۋ جانە قوناەۆ – تالدىقورعان – الاكول باعىتى بويىنشا 4G جانە 5G جەلىلەرىنىڭ مۇمكىندىكتەرىن ارتتىرۋ جوسپارلانعان. 4G بايلانىسى بالقاش كولىنىڭ ماڭىندا دا قولجەتىمدى. بۇل ىشكى ءتۋريزمنىڭ تاعى ءبىر سۇرانىسقا يە باعىتى سانالادى.
«قازاقستان – اۋماعى ءىرى مەملەكەت، ال ەڭ كورىكتى ورىندارىمىزدىڭ كوبى ءىرى قالالاردان شالعايدا ورنالاسقان: تاۋ، دالا، كول جاعاسىندا جانە كاسپي تەڭىزى ماڭىندا. ءبىز قازاقستاندىق كومپانيا بولعاندىقتان، زاماناۋي تەحنولوگيالاردىڭ تەك مەگاپوليس تۇرعىندارىنا عانا ەمەس، بۇكىل ەل ازاماتتارىنا قولجەتىمدى بولعانىن قالايمىز. ابونەنتتەرىمىز بۋرابايدا، الاكولدە، كاسپي جاعالاۋىندا نەمەسە الماتى تاۋلارىنداعى ءۇش مىڭ مەتردەن استام بيىكتىكتە بولسا دا ءاردايىم بايلانىستا بولۋى ءتيىس. بۇل جەردە ورتاق ءتاسىل قاجەت: وپەراتور جەلىگە ينۆەستيتسيا سالۋعا جانە ونى دامىتۋعا دايىن، ال ەڭ شالعاي نۇكتەلەردە بايلانىس پايدا بولۋى ءۇشىن ەڭ الدىمەن ەلەكتر قۋاتى مەن دايىن ينفراقۇرىلىم قاجەت. مۇنداي مىندەتتەردى وڭىرلەرمەن بىرلەسە شەشكەن الدەقايدا ءتيىمدى»، – دەدى «كسەلل» اق باسقارما توراعاسى اسقار جامباكين.
تۋريستىك ماۋسىم اياقتالعانىمەن، جەلىنى دامىتۋ جۇمىستارى توقتامايدى. جاز بويى جينالعان جۇكتەمە تۋرالى دەرەكتەر كومپانيانىڭ جەلىنى جاڭعىرتۋ باعدارلاماسىن قالىپتاستىرۋ كەزىندە پايدالانىلادى.
كەلەسى مىندەت – تەك تۋريستىك نىسانداردىڭ وزىندە عانا ەمەس، ولاردى بايلانىستىراتىن باعىتتاردا دا بايلانىستى دامىتۋ. بۇعان اۆتوموبيل جولدارى، دەمالىس ايماقتارىنا اپاراتىن جولدار جانە تۋريستىك اعىن وتەتىن شاعىن ەلدى مەكەندەر كىرەدى.
جوبالاردىڭ ءبىر بولىگى 2026-2027 جىلدارعا جوسپارلانعان. قولدانىستاعى نىسانداردا كومپانيا جەلى سىيىمدىلىعىن ارتتىرىپ، جابدىقتاردى جاڭعىرتادى. ال قامتۋ دەڭگەيى جەتكىلىكسىز اۋماقتاردا قاجەتتى ينفراقۇرىلىم دايىن بولعان سايىن جاڭا بايلانىس نىساندارى سالىنادى.
