«Кселл» АҚ (Kcell және activ брендтері) 2026 жылғы жазғы маусымда Қазақстанның танымал туристік бағыттарындағы желі жұмысының нәтижелерін қорытындылады.
Маусым алдында және оның барысында компания курорттық аймақтарда, автожолдар бойында және жаз мезгілінде ұялы желіге түсетін жүктеме күрт артатын орындарда 4G мен 5G желілерін күшейтті.
Елдегі туризм саласы өсіп келеді. Ұлттық статистика бюросының мәліметінше, 2026 жылдың алғашқы жартысында Қазақстандағы қонақүйлер, демалыс базалары және басқа да туристік нысандар қызметін 4,77 миллион адам пайдаланған.
Ұялы желі үшін туристік бағыттардың басты ерекшелігі – жыл ішінде жүктеменің күрт өзгеруі. Әдетте бірнеше мың адам болатын орындарда маусым қызған шақта пайдаланушылар саны бірнеше есе артады. Соған сәйкес ұялы интернет тұтыну көлемі де ұлғаяды: туристер навигацияны, мессенджерлер мен әлеуметтік желілерді пайдаланады, фото және бейнематериалдар жүктейді, бейнеқоңырау шалады әрі интернетті басқа құрылғыларға таратады.
Сондықтан туристік маусымға дайындық барысында Kcell қамту аумағын кеңейтіп қана қоймай, жүктеме артатын орындарда желінің өткізу қабілетін де арттырады.
Солтүстік
Елдегі ең танымал туристік бағыттардың бірі – Щучинск-Бурабай курорттық аймағы. Ұлттық статистика бюросының дерегіне сәйкес, 2026 жылдың алғашқы тоқсанында ғана бұл өңірге 116,7 мың адам барған.
Щучинск қаласында 700 МГц диапазонында жұмыс істейтін 5G технологиясындағы екі базалық станция қызмет көрсетеді. Төмен жиілік сигналдың кең аумаққа таралуына мүмкіндік береді. Бұл әсіресе курорттық аймақтар мен қаладан тыс аумақтар үшін маңызды.
Компания еліміздің солтүстігіндегі негізгі туристік бағыттардың бірі – Астана мен Бурабай арасындағы жолдағы байланыс сапасын да жақсартып жатыр. 2026 жылдың қазан айының соңына дейін бұл бағытта 4G қамтуын кеңейтудің кезекті жұмыстары жүзеге асырылады.
Оңтүстік және таулы өңірлер
Еліміздегі туристік аймақтардың ішінде ең үлкен бөлігі Алматы тау кластеріне тиесілі. Ұлттық статистика бюросының мәліметінше, 2026 жылдың бірінші тоқсанында 509,3 мың адам барған.
Бүгінде Kcell және activ-тің 5G желісі Медеу мен Шымбұлақта қолжетімді. Байланыс теңіз деңгейінен 3 мың метрден астам биіктікте де жұмыс істейді. Мәселен, Шымбұлақ тау шаңғысы курортының ең жоғарғы нүктесі шамамен 3180 метр биіктікте орналасқан.
Ой-Қарағайда үш байланыс нысаны жұмыс істейді: олардың біреуі 5G, екеуі 4G технологиясын қолдайды. Сондай-ақ 4G желісі Ақбұлақта, Түргенде және Бутаковкада қолжетімді.
Kcell және activ-тің 4G желісі Көлсай көлдері аумағында және Саты ауылында да жұмыс істейді. Бұл байланыс инфрақұрылымын дамыту тұрғысынан күрделі өңірлердің бірі, өйткені Көлсай көлдері жүйесі теңіз деңгейінен 2850 метрге дейінгі биіктікте орналасқан.
5G желісі Қонаев қаласы мен Қапшағай су қоймасының жағалауында да қолжетімді. Сондай-ақ Қазақстанның оңтүстігіндегі басты туристік орталықтардың бірі Түркістанда да жоғары жылдамдықты 5G қызметі жұмыс істеп тұр.
Келесі кезеңде компания Алматы – Қонаев және Алматы – Шарын – Көлсай бағыттарындағы байланысты одан әрі күшейтуді жоспарлап отыр.
Алайда шалғай туристік орындарда сапалы байланысты қамтамасыз ету үшін тек телекоммуникациялық жабдық орнату жеткіліксіз. Мысалы, Қайыңды көлі маңында жаңа байланыс нысанын салу үшін жер телімін анықтап, электр қуатымен қамтамасыз ету және деректерді тасымалдау желісіне қосу қажет. Мұндай жобаларды жүзеге асыру үшін оператордың, жергілікті атқарушы органдардың және инфрақұрылымдық ұйымдардың бірлескен жұмысы керек. Электр қуаты, дайын алаң немесе қажетті инфрақұрылым болмаған жағдайда базалық станцияны тек оператордың күшімен салу мүмкін емес.
Қайыңды көлі маңындағы байланыс желісін дамыту жобасы жол картасына енгізілген және инвестормен бірлесіп жүзеге асырылады.
Батыс
Елдің батысында оператор Каспий теңізі жағалауында және Маңғыстау облысының негізгі туристік бағыттарында желіні дамытып келеді. Ұлттық статистика бюросының мәліметінше, 2026 жылдың бірінші тоқсанында Маңғыстау курорттық аймағына 53,3 мың адам келген. Ақтауда Kcell және activ-тің 5G желісі жұмыс істейді. Ал Кендірлі мен Форт-Шевченкода абоненттерге 4G қолжетімді. Ақтау – Кендірлі бағытында компания туристік ағынның өсуі мен курорттық аймақтың әрі қарай дамуын ескере отырып, қолданыстағы байланыс нысандарының мүмкіндіктерін кеңейтуді жалғастырып жатыр.
Шығыс
Жазғы маусымдағы ең белсенді бағыттардың бірі – Алакөл. Қазіргі таңда Kcell және activ-тің 4G желісі Ақши, Қабанбай және Жарбұлақ ауылдарында қолжетімді. Маусым барысында компания өсіп келе жатқан жүктемені ескере отырып, қолданыстағы желіні оңтайландырып, күшейту жұмыстарын жүргізді. Келесі кезеңде Көктұма аумағындағы қамту аймағын кеңейту және Қонаев – Талдықорған – Алакөл бағыты бойынша 4G және 5G желілерінің мүмкіндіктерін арттыру жоспарланған. 4G байланысы Балқаш көлінің маңында да қолжетімді. Бұл ішкі туризмнің тағы бір сұранысқа ие бағыты саналады.
«Қазақстан – аумағы ірі мемлекет, ал ең көрікті орындарымыздың көбі ірі қалалардан шалғайда орналасқан: тау, дала, көл жағасында және Каспий теңізі маңында. Біз қазақстандық компания болғандықтан, заманауи технологиялардың тек мегаполис тұрғындарына ғана емес, бүкіл ел азаматтарына қолжетімді болғанын қалаймыз. Абоненттеріміз Бурабайда, Алакөлде, Каспий жағалауында немесе Алматы тауларындағы үш мың метрден астам биіктікте болса да әрдайым байланыста болуы тиіс. Бұл жерде ортақ тәсіл қажет: оператор желіге инвестиция салуға және оны дамытуға дайын, ал ең шалғай нүктелерде байланыс пайда болуы үшін ең алдымен электр қуаты мен дайын инфрақұрылым қажет. Мұндай міндеттерді өңірлермен бірлесе шешкен әлдеқайда тиімді», – деді «Кселл» АҚ басқарма төрағасы Асқар Жамбакин.
Туристік маусым аяқталғанымен, желіні дамыту жұмыстары тоқтамайды. Жаз бойы жиналған жүктеме туралы деректер компанияның желіні жаңғырту бағдарламасын қалыптастыру кезінде пайдаланылады.
Келесі міндет – тек туристік нысандардың өзінде ғана емес, оларды байланыстыратын бағыттарда да байланысты дамыту. Бұған автомобиль жолдары, демалыс аймақтарына апаратын жолдар және туристік ағын өтетін шағын елді мекендер кіреді.
Жобалардың бір бөлігі 2026-2027 жылдарға жоспарланған. Қолданыстағы нысандарда компания желі сыйымдылығын арттырып, жабдықтарды жаңғыртады. Ал қамту деңгейі жеткіліксіз аумақтарда қажетті инфрақұрылым дайын болған сайын жаңа байланыс нысандары салынады.
