كونستيتۋتسيالىق سوت كرەديتوردىڭ ساناتىنا قاراي سوت ارقىلى بانكروتتىق راسىمىنە قول جەتكىزۋدىڭ ءارتۇرلى بولۋىنا قاتىستى ماسەلە كوتەرىلگەن ءوتىنىشتى قارادى، دەپ حابارلايدى «ادىرنا» ءتىلشىسى.
ءوتىنىش بەرۋشى مۇنداي تالاپ مۇلىكتىك جاعدايى بىردەي ازاماتتاردىڭ قۇقىقتىق جاعدايىندا ايىرماشىلىق تۋدىرۋى مۇمكىن دەپ ەسەپتەگەن.
الايدا كونستيتۋتسيالىق سوت داۋلانىپ وتىرعان نورمانىڭ كونستيتۋتسياعا قايشى كەلمەيتىنىن انىقتاعان.
«زاڭنامادا سوت ارقىلى بانكروتتىق ءراسىمىن قولدانۋدىڭ بىرىڭعاي شارتتارى بەلگىلەنگەن جانە ءتيىستى وتىنىشپەن جۇگىنۋگە قۇقىعى بار ادامدار توبىنا شەكتەۋ قويىلماعان. ءوتىنىش بەرۋشىنىڭ سوت ارقىلى قورعالۋ قۇقىعىنىڭ بۇزىلعانى تۋرالى ۋاجدەرى دە راستالمادى. ونىڭ زاڭدى سوتتاردىڭ دۇرىس قولدانۋىنا جانە ءىستىڭ ناقتى ءمان-جايلارىنا باعا بەرۋ تۋرالى تالابى كونستيتۋتسيالىق سوتتىڭ وكىلەتتىگىنە جاتپايدى»،– دەلىنگەن حابارلامادا.
