تۇركيا بيلىگى ىستامبۇلداعى بوسفور ارقىلى وتەتىن كوپىرلەر مەن اۆتوماگيسترالداردى ساتۋدى جوسپارلاپ وتىرعان جوق. ونىڭ ورنىنا نىسانداردى بەلگىلى ءبىر مەرزىمگە جەكەمەنشىك كومپانيالاردىڭ باسقارۋىنا بەرۋ مۇمكىندىگىن قاراستىرۋدا. بۇل تۋرالى 5 قىركۇيەك كۇنى تۇركيانىڭ قارجى جانە قازىناشىلىق مينيسترلىگى مالىمدەدى، دەپ حابارلايدى “ادىرنا”.
تۇركيا پرەزيدەنتى رەجەپ تايىپ ەردوعان 4 قىركۇيەكتە بوسفور ارقىلى وتەتىن ەكى كوپىر مەن ون اۆتوماگيسترالدى 30 جىل مەرزىمگە جەكەمەنشىك باسقارۋعا بەرۋگە مۇمكىندىك جاسايتىن شەشىمگە قول قويدى.
«بۇل مەملەكەتتىك اكتيۆتەردى ساتۋ تۋرالى ەمەس. مەنشىك قۇقىعى مەملەكەتتە ساقتالاتىن جاعدايدا كاسىپورىندى بەلگىلى ءبىر مەرزىمگە باسقارۋعا بەرۋ مودەلىن باعالاۋعا باعىتتالعان ادەتتەگى دايىندىق جۇمىستارى جۇرگىزىلىپ جاتىر»، – دەپ مينيسترلىك مالىمدەمەسىن Takvim باسىلىمى جاريالادى.
ۆەدومستۆونىڭ مالىمەتىنشە، نىسانداردى جەكەشەلەندىرۋگە قاتىستى تەندەر ازىرگە جاريالانعان جوق. ەردوعاننىڭ شەشىمى تەك جەكەشەلەندىرۋ باسقارماسىنا قاجەتتى دايىندىق جۇمىستارىن جۇرگىزۋگە وكىلەتتىك بەرەدى.
سونىمەن قاتار مينيسترلىك تۇرىك اۆتوماگيسترالدارى مەملەكەتكە جىل سايىن 600 ميلليون دوللار تازا پايدا اكەلەدى دەگەن اقپاراتتى جوققا شىعاردى.
