استانادا بۇرىنعى الماتى اكىمى باۋىرجان بايبەككە تيەسىلى كوللەكتسيالىق ساعاتتاردى ۇرلاۋ دەرەگى بويىنشا قىلمىستىق ءىس تەرگەلىپ جاتىر، دەپ حابارلايدى "ادىرنا" ءتىلشىسى.
پوليتسيانىڭ مالىمەتىنشە، ساعاتتاردى ۇرلادى دەگەن كۇدىكپەن 31 جاستاعى ەر ادام ۇستالعان. قىلمىستىق ءىس قوزعالىپ، تەرگەۋ امالدارى جالعاسىپ جاتىر.
باق-تا تاراعان اقپاراتقا سايكەس، كۇدىكتى بايبەككە قاراستى قىزمەتكەردىڭ كومەكشىسى بولعان جانە ونىڭ ۇيىنە كىرىپ-شىعۋعا مۇمكىندىگى بولعان. ءۇي يەلەرى شەتەلگە كەتكەن كەزدە ول قوسالقى كىلتتى پايدالانىپ، تۇپنۇسقا ساعاتتاردى الدىن الا ساتىپ العان كوشىرمەلەرىمەن اۋىستىرعان دەگەن بولجام ايتىلعان.
حابارلانعان مالىمەت بويىنشا، ۇرلانعان ساعاتتاردىڭ اراسىندا Breguet, Blancpain, Hublot, Jaeger-LeCoultre جانە A. Lange & Söhne برەندتەرىنىڭ بۇيىمدارى بار. ولاردىڭ جالپى قۇنى شامامەن 90 ملن تەڭگە دەپ باعالانعان.
ءۇي يەلەرى ەلگە ورالعاننان كەيىن ساعاتتاردىڭ اۋىستىرىلعانىن انىقتاپ، پوليتسياعا جۇگىنگەن.
ايتا كەتەيىك، باۋىرجان بايبەك ءار جىلدارى قازاقستان رەسپۋبليكاسىنىڭ باس كونسۋلدىعىندا جانە قازاقستان رەسپۋبليكاسىنىڭ گەرمانيا فەدەراتيۆتىك رەسپۋبليكاسىنداعى ەلشىلىگىندە ديپلوماتيالىق قىزمەت اتقارعان.
2002 جىلدان باستاپ قازاقستان رەسپۋبليكاسى پرەزيدەنتى اكىمشىلىگىندە بىرقاتار جاۋاپتى قىزمەتتەردى اتقاردى.
2006 جىلى قازاقستان رەسپۋبليكاسى پرەزيدەنتى پروتوكولىنىڭ باستىعى بولدى.
2009 جىلى قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى قىزمەتىنە تاعايىندالدى.
2013 جىلدىڭ قاڭتارىنان «نۇر وتان» پارتياسى توراعاسىنىڭ ءبىرىنشى ورىنباسارى قىزمەتىن اتقاردى.
2015-2019 جىلدارى الماتى قالاسىنىڭ اكىمى بولدى.
2019-2022 جىلدارى «نۇر وتان» پارتياسى توراعاسىنىڭ ءبىرىنشى ورىنباسارى قىزمەتىن اتقاردى.
