قىرعىزستاننىڭ ءبىرىنشى حانىمى ايگۇل جاپاروۆا 4 قىركۇيەكتە ەتنوبازاردا باعالى تاستارمەن بەزەندىرىلگەن كىلەمدى سىيلىققا الۋدان باس تارتتى، دەپ حابارلايدى "ادىرنا" ءتىلشىسى.
باياستان ەسىمدى ساۋداگەر ءبىرىنشى حانىمعا ونى كوپتەن بەرى كەزدەستىرگىسى كەلگەنىن ايتىپ، ساۋداعا شىعارىلعان كىلەمدى سىيعا تارتقىسى كەلگەن. الايدا ايگۇل جاپاروۆا العىس ايتىپ، سىيلىقتى قابىلداماعان.
ساتۋشىنىڭ ايتۋىنشا، كىلەمنىڭ باعاسى — 35 مىڭ دوللار.
باياستان كىلەمدى باستاپقىدا 31 تامىزدا «بيشكەك ارەنا» ستاديونىندا وتكەن VI دۇنيەجۇزىلىك كوشپەندىلەر ويىندارىنىڭ اشىلۋ سالتاناتىندا ءبىرىنشى حانىمعا تابىستاعىسى كەلگەن. الايدا ول شاراعا كىرە الماعان.
كەيىن ايگۇل جاپاروۆانىڭ قىرچىنعا باراتىنىن ەستىپ، باياستان 2 قىركۇيەكتەن باستاپ ونىڭ كەلۋىن كۇتكەن.
كەيىن جۋرناليستەرگە بەرگەن سۇحباتىندا ساۋداگەر كىلەمدى العاشىندا اناسىنا ارناپ ارنايى جاساتقانىن ايتتى. ونىڭ سوزىنشە، وتباسى قونىس اۋدارعاننان كەيىن كىلەم جاڭا ءۇيدىڭ ديزاينىنا سايكەس كەلمەي قالعان.
ء«بىز كوشىپ كەتتىك، كىلەمنىڭ ديزاينى جاڭا ۇيگە سايكەس كەلمەيدى. سوندىقتان باسقا كىلەمگە تاپسىرىس بەرەمىن»، — دەدى باياستان.
