قورعالجىن اۋدانىندا ءوڭىر تۇرعىندارى مەن استانا جانە قازاقستاننىڭ باسقا دا قالالارىنان كەلگەن قوناقتاردى جيناعان ەكىنشى مادەني-تۋريستىك Flamingo Fest فەستيۆالى وتۋدە، دەپ حابارلايدى وڭىرلىك كوممۋنيكاتسيالار قىزمەتى.
فەستيۆال قورعالجىن اۋىلىنىڭ ورتالىق الاڭىندا اشىلدى. سالتاناتتى باعدارلامانى اتباسار اۋدانىنان كەلگەن «مولودوست» حالىق ءانسامبلى «فلامينگو» حورەوگرافيالىق قويىلىمىمەن باستادى. اشىلۋ باعدارلاماسىن قورعالجىن اۋدانىنان كەلگەن «نۇرلى ساز» كۆارتەتى جالعاستىردى.
فەستيۆالدىڭ ماڭىزى تۋرالى ايتا كەلە، اقمولا وبلىسى اكىمىنىڭ ورىنباسارى دوسۇلان ايتباەۆ ونىڭ وتكىزىلۋى ءوڭىردىڭ تابيعي جانە مادەني مۇراسىنا نازار اۋدارۋعا ىقپال ەتەتىنىن اتاپ ءوتتى. ونىڭ ايتۋىنشا، قورعالجىن ءوڭىرىنىڭ بىرەگەي ەكوجۇيەسىن ساقتاۋ ەرەكشە ماڭىزعا يە.
«قورعالجىن مەملەكەتتىك تابيعي قورىعى — الەمدەگى قىزعىلت قوقيقازداردىڭ ەڭ سولتۇستىك ۇيالايتىن مەكەنى رەتىندە يۋنەسكو-نىڭ دۇنيەجۇزىلىك تابيعي مۇرا تىزىمىنە ەنگەن بىرەگەي ەكوجۇيە. وسىنداي تابيعي بايلىققا يە بولۋ — ءبىز ءۇشىن ۇلكەن ماقتانىش. ونى ساقتاپ، كەلەر ۇرپاققا امانات ەتۋ — ارقايسىمىزدىڭ پارىزىمىز»، — دەپ اتاپ ءوتتى دوسۇلان ايتباەۆ.
مۇرانى ساقتاۋ تاقىرىبىن اقمولا وبلىستىق ارداگەرلەر كەڭەسىنىڭ توراعاسى ەرمەك نۇعىمان جالعاستىردى. ول مۇنداي ءىس-شارالار ۇرپاقتار ساباقتاستىعىن نىعايتۋعا، تۇرعىندار مەن قوناقتاردى تۋعان ولكەنىڭ ەرەكشەلىكتەرىمەن تانىستىرۋعا جانە ونىڭ تۋريستىك الەۋەتىن اشۋعا مۇمكىندىك بەرەتىنىن ايتتى.
«بۇگىنگى سالتاناتتى ءىس-شارا — ءوڭىرىمىزدىڭ تابيعي بايلىعى مەن تاريحي-مادەني مۇراسىن دارىپتەپ قانا قويماي، ۇرپاقتار ساباقتاستىعى مەن حالىق بىرلىگىن نىعايتاتىن يگى باستاما»، — دەپ ءتۇسىندىردى ەرمەك نۇعىمان.
ونىڭ ايتۋىنشا، جىل سايىن مىڭداعان قىزعىلت قوقيقازدىڭ قورعالجىن وڭىرىنە كەلۋى الەمنىڭ تۇكپىر-تۇكپىرىنەن عالىمدار مەن تۋريستەردىڭ قىزىعۋشىلىعىن ارتتىرادى. سونىمەن بىرگە تابيعي كورىكتى جەرلەردى تەك ءتۋريزمدى دامىتۋعا نەگىز بولاتىن نىسان رەتىندە عانا ەمەس، ساقتالۋى بارشاعا ورتاق مىندەت بولىپ تابىلاتىن مۇرا رەتىندە قاراستىرعان ماڭىزدى.
بۇل يدەيا Flamingo Fest باعدارلاماسىندا دا جالعاسىن تاپتى. قازىردىڭ وزىندە ورتالىق الاڭدا كورمە الاڭدارى جۇمىس ىستەپ تۇر. Flamingo Art اياسىندا وبلىستىڭ ءار اۋدانىنان كەلگەن سۋرەتشىلەر ءوز تۋىندىلارىن تانىستىرسا، ساندىك-قولدانبالى ونەر شەبەرلەرى قوناقتارعا قولونەر بۇيىمدارىن ۇسىنىپ، كورمە-جارمەڭكە وتكىزۋدە.
باعدارلامانىڭ جەكە بولىگى قوناقتاردى تابيعي كورىكتى جەرلەرمەن تانىستىرۋعا ارنالعان. فەستيۆال قاتىسۋشىلارى ءۇشىن قىزعىلت قوقيقازدار مەكەندەيتىن جەرلەرگە ەكسكۋرسيا ۇيىمداستىرىلدى. گيدتەر مەن ماماندار قورىق اۋماعىنىڭ ەرەكشەلىكتەرى، ونىڭ تابيعي ماڭىزى جانە تابيعاتتى قورعاۋ ايماعىندا ءوزىن-ءوزى ۇستاۋ ەرەجەلەرى تۋرالى اڭگىمەلەيدى.
كۇنى بويى فەستيۆال باعدارلاماسى كونتسەرتتىك قويىلىمدارمەن جالعاسادى. ساحنادا فولكلورلىق ۇجىمدار مەن جاس دومبىراشىلار ونەر كورسەتەدى. سونداي-اق «ۇلى دالا اۋەنى» حالىق مۋزىكاسى فەستيۆالى وتەدى.
ەسكە سالا كەتەيىك، بيىلعى Flamingo Fest قورعالجىن اۋدانى ءۇشىن ەكىنشى رەت ۇيىمداستىرىلىپ وتىر. فەستيۆال العاش رەت بىلتىرعى جىلى بىتىعاي تاريحي كەشەنى اۋماعىندا وتكىزىلگەن بولاتىن. بيىل نەگىزگى ءىس-شارالار اۋىل ورتالىعىنا كوشىرىلىپ، فەستيۆال الاڭى اۋدان تۇرعىندارى مەن قوناقتارى ءۇشىن بارىنشا قولجەتىمدى بولا ءتۇستى.
