كوكشەتاۋدا اقمولا وبلىسى انالار كەڭەسىنىڭ ۇيىمداستىرۋىمەن «وتباسى – باقىت مەكەنى» وبلىستىق كونفەرەنتسياسى ءوتتى. جيىندا بالا تاربيەسى، اتا-انا جاۋاپكەرشىلىگى، وتباسى قاۋىپسىزدىگى جانە ۇلتتىق قۇندىلىقتاردى دارىپتەۋ ماسەلەلەرى تالقىلاندى.
ءىس-شاراعا اقمولا وبلىسى ىشكى ساياسات باسقارماسىنىڭ باسشىسى گۇلميرا كارىموۆا، انالار كەڭەسىنىڭ مۇشەلەرى، اقساقالدار، اجەلەر، اكەلەر، ۇستازدار جانە قوعامدىق ۇيىم وكىلدەرى قاتىستى.
گۇلميرا توقتارقىزى كونفەرەنتسيا قاتىسۋشىلارىنا وبلىس اكىمىنىڭ قۇتتىقتاۋىن جەتكىزىپ، وتباسى ينستيتۋتىن نىعايتۋ مەن ۇرپاق تاربيەسىنە جاۋاپكەرشىلىكپەن قاراۋدىڭ ماڭىزىن اتاپ ءوتتى.
كونفەرەنتسيانى وبلىستىق انالار كەڭەسىنىڭ توراعاسى اينۇر جاحينا جۇرگىزدى.
جيىندا وتباسى بەرەكەسى مەن بالا قاۋىپسىزدىگى، تۇرمىستىق زورلىق-زومبىلىقتىڭ الدىن الۋ، ۇلكەندەردىڭ ونەگەسى، اكەنىڭ بالا تاربيەسىندەگى ءرولى، ينكليۋزيۆتى قوعام قالىپتاستىرۋ جانە مەكتەپ پەن وتباسى اراسىنداعى بايلانىس ماسەلەلەرى قوزعالدى.
پوليتسيا مايورى، وتباسىلىق-تۇرمىستىق زورلىق-زومبىلىققا قارسى كۇرەس بولىمشەسىنىڭ باسشىسى نازيرا تۇرسىمباەۆا وتباسى قاۋىپسىزدىگى مەن قۇقىقتىق جاۋاپكەرشىلىك تۋرالى ايتتى. اقساقالدار كەڭەسىنىڭ مۇشەسى بولات زاكەنوۆ ۇلكەننىڭ ونەگەسى مەن ۇرپاق تاربيەسىندەگى تاعىلىمعا توقتالدى.
وبلىستىق انالار كەڭەسى جانىنداعى اجەلەر كلۋبىنىڭ مۇشەسى ءشامشيا توعايباەۆا اجە تاربيەسىنىڭ ماڭىزىنا توقتالسا، استراحان اۋدانى انالار كەڭەسىنىڭ مۇشەسى دانەكەر حولعانات ۇلتتىق تاربيەدەگى اجە ونەگەسى تۋرالى وي ءبولىستى.
اكەلەر وداعىنىڭ بەلسەندى مۇشەسى، ساكەن ءجۇنىسوۆ اتىنداعى №18 مەكتەپ-ليتسەيىنىڭ كوركەم ەڭبەك ءپانى مۇعالىمى الماسبەك بەگزان اكەنىڭ وتباسىنداعى جاۋاپكەرشىلىگى مەن بالا تاربيەسىندەگى ءرولى تۋرالى تاجىريبەسىمەن ءبولىستى.
«Qolqanat» الەۋمەتتىك جوباسىنىڭ نەگىزىن قالاۋشى ءارى جەتەكشىسى راۋشان تۇرانوۆا مەيىرىمدى وتباسى مەن ينكليۋزيۆتى قوعام قالىپتاستىرۋ ماسەلەسىن كوتەردى. ال ءال-فارابي اتىنداعى IT مەكتەپ-ليتسەيىنىڭ ديرەكتورى ايگەرىم بەرشىموۆا مەكتەپ پەن اتا-انا اراسىنداعى بايلانىستى كۇشەيتۋدىڭ ماڭىزىنا توقتالدى.
قاتىسۋشىلار بالا تاربيەسى، اتا-انا جاۋاپكەرشىلىگى جانە وتباسى قۇندىلىقتارى جونىندە پىكىر الماستى.
كونفەرەنتسيا بارىسىندا وتباسى كۇنىنە ارنالعان مەرەكەلىك ءىس-شارا اياسىندا ۇيىمداستىرىلعان وتباسىلىق بايقاۋلاردىڭ جەڭىمپازدارى ماراپاتتالدى.
«ەرەكشە بالا تاربيەلەگەن وتباسى» نوميناتسياسىندا كوكشەتاۋ قالاسىنىڭ تۇرعىنى سەرگەي دەمەششەنكونىڭ وتباسى جەڭىمپاز اتاندى.
«كۇمىس كەرەگە» نوميناتسياسىنىڭ جەڭىمپازى – شورتاندى اۋدانىنىڭ تۇرعىنى ماحشاناي ءومىردوستىڭ وتباسى.
ال «التىن شاڭىراق» نوميناتسياسى تسەلينوگراد اۋدانى، قوياندى اۋىلىنىڭ تۇرعىنى بايانباي مالىكۇلىنىڭ وتباسىنا تابىستالدى.
سونىمەن قاتار ۇلتتىق ۇلان قاتارىندا 20 جىل ابىرويلى قىزمەت اتقارىپ، وتباسىلىق ومىردە دە 20 جىلدىق بەرەكەلى نەكەنىڭ ونەگەسىن كورسەتىپ، بەس بالا تاربيەلەپ وتىرعان باۋىرجان نۇرعاليەۆ پەن اياگۇل تۇرعىنوۆانىڭ وتباسى ماراپاتتالدى.
ءىس-شارانى ۇيىمداستىرۋعا قولداۋ كورسەتكەن «رومانتيك» گۇلدەر جۇيەسى مەن «گولد سيتي» زەرگەرلىك جۇيەسىنىڭ جەتەكشىلەرىنە العىس ءبىلدىرىلدى.
كونفەرەنتسيا سوڭى كونتسەرتتىك باعدارلامامەن جالعاستى. ارۋجان عايدارقىزى ەستاي بەركىنبايۇلىنىڭ «ساندۋعاش» ءانىن ورىنداپ، «امانات» كۆارتەتى ونەر كورسەتتى.
ۇيىمداستىرۋشىلاردىڭ ايتۋىنشا، وتباسىداعى تاتۋلىق پەن ءوزارا قۇرمەت – بالا تاربيەسىنىڭ عانا ەمەس، قوعامداعى تۇراقتىلىق پەن ءوزارا تۇسىنىستىكتىڭ دە ماڭىزدى نەگىزدەرىنىڭ ءبىرى.
