ازەربايجان پرەزيدەنتى يلحام اليەۆ يتاليا پرەمەر-ءمينيسترى دجوردجا مەلونيدى ەل تاريحىنداعى ۇكىمەت باسشىسى قىزمەتىندە ەڭ ۇزاق ۋاقىت وتىرعان ساياسي كوشباسشى اتانۋىمەن قۇتتىقتادى. ازەربايجان باسشىسى بۇل تۋرالى ءوزىنىڭ X الەۋمەتتىك جەلىسىندەگى پاراقشاسىندا جازدى، دەپ حابارلايدى “ادىرنا”.
يلحام اليەۆتىڭ ايتۋىنشا، دجوردجا مەلونيدىڭ بۇل جەتىستىگى ونىڭ كوشباسشىلىق قابىلەتىن، ساياسي تاباندىلىعىن جانە يتاليا حالقىنىڭ وعان دەگەن سەنىمىن كورسەتەدى.
«يتاليا رەسپۋبليكاسىنىڭ تاريحىنداعى ۇكىمەت باسشىسى قىزمەتىندە ەڭ ۇزاق ۋاقىت بولۋ رەكوردىن ورناتقان پرەمەر-مينيستر دجوردجا مەلونيدى شىن جۇرەكتەن قۇتتىقتايمىن. بۇل تاريحي جەتىستىك ونىڭ مىقتى كوشباسشىلىعىن، ساياسي تاباندىلىعىن جانە يتاليا حالقىنىڭ سەنىمىن كورسەتەدى»، – دەپ جازدى ازەربايجان پرەزيدەنتى.
سونىمەن قاتار يلحام اليەۆ دجوردجا مەلونيدىڭ ازەربايجان مەن يتاليا اراسىنداعى ستراتەگيالىق سەرىكتەستىكتى نىعايتۋعا قوسقان ۇلەسىن اتاپ ءوتتى.
ول ەكى ەل اراسىنداعى دوستىق پەن ءوزارا ءتيىمدى ىنتىماقتاستىقتىڭ الداعى ۋاقىتتا دا تەرەڭدەپ، كەڭەيە بەرەتىنىنە سەنىم ءبىلدىردى.
دجوردجا مەلوني يتاليا ۇكىمەتىن 2022 جىلدىڭ قازان ايىنان بەرى باسقارىپ كەلەدى. ول يتاليانىڭ «يتاليا باۋىرلارى» (Fratelli d’Italia) پارتياسىنىڭ جەتەكشىسى. مەلونيدىڭ پرەمەر-مينيستر رەتىندە ۇزاق ۋاقىت قىزمەت اتقارۋى يتاليانىڭ قازىرگى ساياسي تاريحىنداعى ماڭىزدى كورسەتكىشتەردىڭ ءبىرى سانالادى.
