مادەنيەت جانە اقپارات ءمينيسترى ايدا بالاەۆا ۇلتتىق قۇرىلتايدىڭ بىرقاتار مۇشەسىنە قاتىستى الەۋمەتتىك جەلىلەردە تارالىپ جاتقان پىكىرلەرگە بايلانىستى مالىمدەمە جاسادى، دەپ حابارلايدى «ادىرنا» ءتىلشىسى.
«قۇرمەتتى ارىپتەستەر! سوڭعى كۇندەرى قۇرىلتايدىڭ بىرقاتار دەپۋتاتتارىنا قاتىستى، ونىڭ ىشىندە تۇرعىن ءۇي ماسەلەسى بويىنشا ءتۇرلى الىپقاشپا اڭگىمەلەر مەن ورىنسىز پىكىرلەر ايتىلىپ، مۇنىڭ سوڭى بۋللينگكە ۇلاسىپ بارا جاتقانى بايقالادى.
مادەنيەت جانە اقپارات ءمينيسترى رەتىندە مەملەكەت باسشىسى مادەنيەت جانە مەديا سالاسى قىزمەتكەرلەرىنىڭ تۇرعىن ءۇي ماسەلەسىن جۇيەلى تۇردە شەشىپ كەلە جاتقانىن اتاپ وتكىم كەلەدى.
العاشقى جىلدارى جۋرناليستەرگە پاتەرلەر رەداكتسيالار ۇسىنعان تىزىمدەر بويىنشا بەرىلدى. كەيىنگى جىلداردان باستاپ بۇگىنگە دەيىن پاتەرلەر تۇرعىن ءۇي بەرۋ قاعيدالارىنا سايكەس، مەنشىگىندە جىلجىمايتىن مۇلكى جوق سالا قىزمەتكەرلەرىنە عانا بەرىلىپ كەلەدى»،– دەدى ول.
مينيستر قوعامدا تۇسىنبەۋشىلىك تۋىنداماۋى ءۇشىن مەملەكەتتىك ورگاندار وكىلدەرى مەن قۇرىلتاي مۇشەلەرى بۇقارالىق اقپارات قۇرالدارى كوتەرگەن ماسەلەلەر بويىنشا قاجەتتى تۇسىنىكتەمەلەر بەرۋگە ءتيىس ەكەنىن اتاپ ءوتتى.
سونىمەن قاتار ايدا بالاەۆا كاسىبي جۋرناليستيكانىڭ نەگىزگى قاعيدالارىنىڭ ءبىرى – جۋرناليستىك ادەپتى ساقتاۋ ەكەنىن ەسكە سالدى.
«كاسىبي جۋرناليست جۇمىسىنىڭ باستى ولشەمدەرىنىڭ ءبىرى – جۋرناليستىك ادەپتى ساقتاۋ. قۋدالاۋ، جەكە باسقا ءتيىسۋ، ايلا-شارعى جاساۋ، ەلەڭ ەتكىزەر تاقىرىپ ءۇشىن ادەيى ارانداتۋ كاسىبي جۋرناليستكە جاراسپايدى. «ماسس-مەديا تۋرالى» قازاقستان رەسپۋبليكاسى زاڭىنىڭ 26-بابى 4-تارماعىنىڭ تارماقشاسىنا سايكەس، كاسىبي ادەپ نورمالارىن ساقتاۋ – ءجۋرناليستىڭ مىندەتى. مۇنداي تالاپ الەمنىڭ بارلىق ەلىندەگى جۋرناليستەرگە قويىلادى. سىيلاستىق ساپالى جۋرناليستيكانىڭ دامۋىنا ءاردايىم ىقپال ەتەدى. سوندىقتان بارشا ءجۋرناليستى بۇزعانى ءۇشىن ءتيىستى شارالار كوزدەلگەن اككرەديتتەۋ قاعيدالارى مەن ءىس-شارالار رەگلامەنتىن عانا ەمەس، كاسىبي ادەپ نورمالارىن دا ساقتاۋعا شاقىرامىن»،– دەپ تۇيىندەدى ول.
ەسكە سالايىق، بۇعان دەيىن جۋرناليستەن قاشقان دەپۋتات ارمانگۇل توقتامۇراتتىڭ ارەكەتى جەلىدە قىزۋ تالقىلانعان ەدى.
