فوتو جي كومەگىمەن جاسالدى
قازاقستاندا 1 قىركۇيەك – ءبىلىم كۇنى مۇعالىمدەرگە گۇل سىيلاۋ ماسەلەسىنە قاتىستى تۇسىنىكتەمە بەرىلدى، دەپ حابارلايدى "ادىرنا" ءتىلشىسى.
وقۋ-اعارتۋ مينيسترلىگى مۇعالىمگە گۇل سىيلاۋعا تولىق تىيىم سالىنباعانىن ايتتى. ۆەدومستۆونىڭ مالىمەتىنشە، ۇستازعا گۇل سىيلاۋ جاقسى ءداستۇر رەتىندە قالا بەرەدى. الايدا بۇل اتا-انالار مەن وقۋشىلار ءۇشىن مىندەت بولماۋى ءتيىس. گۇل سىيلاۋ نەمەسە سىيلاماۋ – ءار وتباسىنىڭ ەرىكتى تاڭداۋى. مينيسترلىك ءبىلىم بەرۋ ۇيىمدارى اتا-انالارعا گۇل نەمەسە سىيلىق ساتىپ الۋدى مىندەتتەمەۋى، اقشا جيناۋدى ۇيىمداستىرماۋى جانە مۇنداي باستامانى وزدەرى كوتەرمەۋى كەرەكتىگىن اتاپ ءوتتى.
سونداي-اق گۇلدىڭ باعاسى مەن كولەمىنەن بۇرىن وقۋشىنىڭ مۇعالىمگە دەگەن قۇرمەتى ماڭىزدى ەكەنى ايتىلدى.
بۇعان دەيىن وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا مەكتەپ قابىرعاسىندا مۇعالىمدەرگە گۇل نەمەسە باسقا دا سىيلىق بەرۋگە بولمايتىنىن ايتقان ەدى. بۇل مالىمدەمە اتا-انالار مەن گۇل ساتۋمەن اينالىساتىن كاسىپكەرلەر اراسىندا پىكىرتالاس تۋعىزدى.
