وتاندىق تەلەۆيزيا سالاسىنىڭ ارداگەرى، بەلگىلى تەلەجۋرناليست تىلەۋقابىل مىڭجاسار 75 جاسقا قاراعان شاعىندا دۇنيەدەن ءوتتى. قارالى حاباردى تەلەجۇرگىزۋشى رينات كەرتاەۆ الەۋمەتتىك جەلىدەگى پاراقشاسىندا جاريالادى، دەپ حابارلايدى "ادىرنا".
«تىلەۋقابىل اعا – جۋرناليستيكانى قىزمەت ەمەس، ءومىرىنىڭ ءمانى دەپ تۇسىنگەن ازامات ەدى»، – دەپ جازدى رينات كەرتاەۆ.
ونىڭ ايتۋىنشا، تىلەۋقابىل مىڭجاسار كوپ جىلدىق تاجىريبەسى بار كاسىبي مامان بولۋمەن قاتار، كەيىنگى بۋىنعا باعىت-باعدار بەرىپ، اقىلىن ايتىپ جۇرگەن سىيلى اعا بولعان. ءجۋرناليستىڭ قازاسىنا نە سەبەپ بولعانى ازىرگە بەلگىسىز.
مارقۇمنىڭ جانازاسى 29 تامىز كۇنى 10:00-دە ءوز شاڭىراعىندا وتەدى.
تىلەۋقابىل مىڭجاسار 1952 جىلى تۇركىستان قالاسىندا دۇنيەگە كەلگەن. 1975 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. سول جىلى قازاق تەلەۆيزياسىنىڭ بالالار مەن جاسوسپىرىمدەر رەداكتسياسىندا العاشقى حابارى ەفيرگە شىقتى.
ول «حابار» اگەنتتىگى قۇرىلعاننان بەرى وسى سالادا ەڭبەك ەتىپ، 1998 جىلدان باستاپ الماتى وبلىسىنداعى مەنشىكتى ءتىلشى قىزمەتىن اتقاردى. قىرىق جىلدان استام ۋاقىتىن جۋرناليستيكاعا ارناعان مامان ەل وڭىرلەرىن ارالاپ، حالىقتىڭ الەۋمەتتىك جاعدايىن، سونداي-اق اۋىل-ايماقتارداعى وزەكتى ماسەلەلەردى رەسپۋبليكالىق تەلەارنا ەفيرىندە تۇراقتى كوتەرىپ وتىردى.
كاسىبي ەڭبەگى ەلەنگەن جۋرناليست قازاقستان جۋرناليستەر وداعى سىيلىعىنىڭ لاۋرەاتى اتانىپ، الماتى وبلىسىنىڭ قۇرمەتتى ازاماتى بولدى. سونىمەن قاتار «حابار» اگەنتتىگىنىڭ «التىن ميكروفون» سىيلىعىمەن ماراپاتتالعان. ەڭبەگى ءۇشىن مەدال جانە قازاقستان پرەزيدەنتىنىڭ العىس حاتىن العان.
مارقۇمنىڭ وتباسى مەن جاقىندارىنا قايعىرىپ كوڭىل ايتامىز.
