پرەزيدەنت قاسىم-جومارت توقاەۆ اقوردادا حالىقارالىق ءپان وليمپيادالارىندا ۇزدىك ناتيجە كورسەتىپ، جۇلدەلى ورىندارعا يە بولعان وقۋشىلار مەن ستۋدەنتتەرمەن كەزدەستى، دەپ حابارلايدى "ادىرنا".
كەزدەسۋگە حالىقارالىق ءبىلىم دودالارىندا ەل نامىسىن قورعاعان 21 لاۋرەات، سونداي-اق ولاردىڭ ۇستازدارى مەن تالىمگەرلەرى قاتىستى. جاس زياتكەرلەر فيزيكا، حيميا، بيولوگيا، ماتەماتيكا، ينفورماتيكا، گەوگرافيا جانە لينگۆيستيكا پاندەرى بويىنشا وتكەن بەدەلدى وليمپيادالاردا قازاقستان قورجىنىنا 6 التىن، 11 كۇمىس جانە 4 قولا مەدال سالدى.
مەملەكەت باسشىسى ەلىمىزدىڭ قازىرگى كەزەڭىن تاريحي جاڭعىرۋ ءداۋىرى رەتىندە باعالاپ، سوڭعى ۋاقىتتا جۇزەگە اسىرىلعان اۋقىمدى ساياسي رەفورمالارعا توقتالدى.
ء«بىز ءبىر ەل، ءبىر حالىق بولىپ اۋقىمدى رەفورمالاردى جۇزەگە اسىردىق. جاڭا كونستيتۋتسيامىزدى قابىلدادىق. ەلىمىزدىڭ باس قۇجاتىندا عىلىم مەن بىلىمگە، يننوۆاتسياعا باسىمدىق بەردىك. ەڭ باستىسى، جاڭا كونستيتۋتسيا وسكەلەڭ ۇرپاقتىڭ يگىلىگى ءۇشىن جازىلدى»، – دەدى قاسىم-جومارت توقاەۆ.
پرەزيدەنت سونداي-اق قازاقستان تاريحىندا العاش رەت قۇرىلتاي سايلاۋى وتكەنىن اتاپ ءوتتى. ونىڭ ايتۋىنشا، سايلاۋ جوعارى دەڭگەيدە ۇيىمداستىرىلىپ، ازاماتتار جاڭارۋ ستراتەگياسىنا قولداۋ ءبىلدىردى.
«كەشە عانا تاريحىمىزدا تۇڭعىش رەت قۇرىلتاي سايلاۋى ءوتتى. بۇل سايلاۋ ءساتتى، ءمىنسىز ۇيىمداستىرىلدى دەپ ايتساق، قاتە بولماس. وسى مۇمكىندىكتى پايدالانىپ، بۇكىل حالقىمىزعا ازاماتتىق كەمەلدىك تانىتىپ، جاڭارۋ ستراتەگيامىزدى قولداعانى ءۇشىن مىڭ دا ءبىر العىسىمدى ايتامىن»، – دەدى پرەزيدەنت.
مەملەكەت باسشىسى سايلاۋ بارىسىندا جۇمىس ىستەگەن وتاندىق جانە حالىقارالىق بايقاۋشىلارعا، سونداي-اق ورتالىق سايلاۋ كوميسسياسىنىڭ مۇشەلەرىنە العىس ءبىلدىردى.
ايتا كەتەيىك، 2026 جىلعى 15 ناۋرىزدا وتكەن جالپىحالىقتىق رەفەرەندۋمدا قابىلدانعان جاڭا كونستيتۋتسيا 1 شىلدەدەن باستاپ كۇشىنە ەندى. وسىعان بايلانىستى بۇرىنعى ءماجىلىس پەن سەنات ءوز جۇمىسىن توقتاتىپ، دەپۋتاتتاردىڭ وكىلەتتىگى اياقتالدى.
جاڭا كونستيتۋتسياعا سايكەس، قازاقستاندا ءبىر پالاتالى پارلامەنت – قۇرىلتاي قۇرىلدى. ونىڭ قۇرامىنا بەس جىل مەرزىمگە سايلاناتىن 145 دەپۋتات كىرەدى.
23 تامىزدا قازاقستاندا العاش رەت قۇرىلتاي دەپۋتاتتارىنىڭ سايلاۋى ءوتتى. ورتالىق سايلاۋ كوميسسياسىنىڭ الدىن الا مالىمەتىنە سايكەس، سايلاۋشىلار تىزىمىنە 12 623 289 ازامات ەنگىزىلگەن. ولاردىڭ 9 351 539-ى نەمەسە 73,8 پايىزى داۋىس بەرۋگە قاتىستى.
قۇرىلتايعا ءوتۋ ءۇشىن ساياسي پارتيالار جالپى داۋىس سانىنىڭ كەمىندە 5 پايىزىن جيناۋى ءتيىس بولدى.
