استانادا پرەزيدەنت قاسىم-جومارت توقاەۆتىڭ قاتىسۋىمەن پارلامەنتتىك رەفورما جونىندەگى جۇمىس توبىنىڭ وتىرىسى ءوتتى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
جيىندا مەملەكەتتىك كەڭەسشى ەرلان قارين پرەزيدەنتكە جۇمىس توبىنىڭ اتقارعان قىزمەتى تۋرالى بايانداپ، پارلامەنتتى ترانسفورماتسيالاۋعا قاتىستى ۇسىنىلىپ وتىرعان كونستيتۋتسيالىق وزگەرىستەردىڭ كولەمى اۋقىمدى ەكەنىنە نازار اۋداردى.
مەملەكەتتىك كەڭەسشى جۇمىس توبى مۇشەلەرىنىڭ ورتاق پىكىرىن جەتكىزىپ، بۇل وزگەرىستەر ساياسي جۇيەنى ۋاقىت تالابىنا ساي جاڭعىرتۋعا ىقپال ەتەتىنىن ايتتى.
پرەزيدەنتتىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ ازاماتتاردان كەلىپ تۇسكەن ۇسىنىستار نەگىزىندە كونستيتۋتسيالىق رەفورما جونىندەگى جۇمىس توبى مۇشەلەرى ازىرلەگەن باستى تاسىلدەر تۋرالى باياندادى.
اتاپ ايتقاندا، بىلتىرعى قازان ايىنان بەرى ءوتىپ كەلە جاتقان وتىرىستاردا جاڭا پارلامەنتكە قاتىستى ماسەلەلەردىڭ ءبارى قارالدى. ونىڭ ىشىندە دەپۋتاتتار سانى، وكىلەتتىك مەرزىمدەرى، سايلاۋ ءتارتىبى، ءبىر پالاتالى پارلامەنتتىڭ زاڭ شىعارۋ تەتىكتەرى، سونداي-اق ونىڭ بيلىكتىڭ وزگە ينستيتۋتتارىمەن ءوزارا ءىس-قيمىل ماسەلەلەرى قامتىلدى.
پارلامەنت ماجىلىسىندەگى «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ جانە «اق جول» پارتياسىنىڭ كوشباسشىسى ازات پەرۋاشەۆ, جالپىۇلتتىق سوتسيال-دەموكراتيالىق پارتيا» فراكتسياسىنىڭ باسشىسى اسحات راحىمجانوۆ پارلامەنتتىك رەفورما اياسىندا جۇزەگە اسىرىلاتىن كونستيتۋتسيالىق وزگەرىستەردىڭ اۋقىمدى ەكەنىن مالىمدەدى. ولار وڭىرلەردە پارلامەنت دەپۋتاتتارىنىڭ جۇمىس كەزدەسۋلەرى بارىسىندا ازاماتتاردىڭ الداعى ساياسي رەفورماعا ايرىقشا قىزىعۋشىلىق تانىتىپ وتىرعانىن جەتكىزدى.
سونداي-اق جيىندا پارلامەنت سەناتىنىڭ كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى نۇرلان بەكنازاروۆ, پارلامەنت ءماجىلىسىنىڭ دەپۋتاتتارى ءۇنزيلا شاپاق, مارات ءباشىموۆ، نيكيتا شاتالوۆ، ساياساتتانۋشى ءبورىحان نۇرمۇحامەدوۆ پىكىرلەرىن ءبىلدىردى.
