اقش پرەزيدەنتى ەل اۋماعىندا تۋعان شەتەلدىكتەردىڭ بالالارىنا اۆتوماتتى تۇردە ازاماتتىق بەرۋ ءتارتىبىن شەكتەۋگە باعىتتالعان ەكى جارلىققا قول قويدى، دەپ حابارلايدى "ادىرنا" ءتىلشىسى ۆۆس-گە سىلتەپ.
قۇجاتتار 6 تامىزدا قابىلداندى.
بۇل – ترامپتىڭ وسى ماسەلە بويىنشا جاساعان ەكىنشى ارەكەتى. بۇعان دەيىن ونىڭ العاشقى جارلىعى اقش جوعارعى سوتىندا داۋعا ءتۇسىپ، سوت ونى كونستيتۋتسياعا قايشى دەپ تاپقان ەدى.
جاڭا جارلىقتاردىڭ ءبىرى اقش-تا تۋعان بالانىڭ ازاماتتىق الۋىنا قاتىستى جاعدايلاردى شەكتەيدى. ەگەر بالانىڭ اتا-اناسىنىڭ ەشقايسىسى اقش ازاماتى بولماسا جانە ولاردىڭ ءبىرى تەرروريستىك ۇيىممەن بايلانىستى بولسا، اقش ازاماتتىعىن زاڭسىز جولمەن الۋعا تىرىسسا نەمەسە باسقا مەملەكەتتىڭ اتىنان جۇمىس ىستەسە، بالاسىنا اۆتوماتتى تۇردە ازاماتتىق بەرىلمەۋى مۇمكىن.
بۇل تالاپ ديپلوماتتاردىڭ بالالارىنا دا قاتىستى.
ەكىنشى جارلىق «بوسانۋ تۋريزمىنە» تىيىم سالۋعا باعىتتالعان. ياعني جۇكتى شەتەلدىك ايەلدەردىڭ بالاسىنا اقش ازاماتتىعىن بەرۋ ءۇشىن ارنايى امەريكاعا بارىپ، سول جەردە بوسانۋىنا جول بەرمەۋ كوزدەلىپ وتىر.
ترامپتىڭ اكىمشىلىگى مۇنداي ايەلدەردىڭ كەيبىرى اقش-قا تۋريست رەتىندە كەلىپ، شىن مانىندە بالا تۋ ءۇشىن پايدالاناتىنىن ايتادى.
ترامپ بۇل وزگەرىستەردى كوشى-قوندى شەكتەۋ جونىندەگى ساياساتىنىڭ ءبىر بولىگى رەتىندە قاراستىرادى.
